Il-Fondazzjoni tal-Ajruport Internazzjonali ta’ Malta u l-Fondazzjoni Wirt Artna inawguraw ir-restawr li sar fuq il-Combined Operations room u kmamar anċillari oħra, li huma parti minn kumpless ta’ żmien il-Gwerra fil-Barrakka ta’ Fuq fil-Belt. Din kienet l-ewwel kamra għall-operazzjonijiet tax-xorta tagħha fl-istorja.
Għal dan il-proġett il-Fondazzjoni tal-Ajrurport tat għajnuna ta’ €340,000, l-akbar investiment tagħha fil-prodott kulturali sal-lum. Issa li l-proġett tlesta, jaf ikun wieħed mill-aqwa attrazzjonijiet militari fil-pajjiż.
Iċ-Chairman ta’ Wirt Artna, Mario Farrugia qal, “Meta l-Fondazzjoni Wirt Artna fl-2009 ħadet il-propjetà mingħand il-Gvern biex tirrestawraha u tiftaħha għall-pubbliku, sabitha fi stat ħażin ħafna. Kien biss bl-għajnuna tal-Malta Airport Foundation li stajna nagħmlu x-xogħol biex niftħuha għall-pubbliku kif inhi llum.”
Iċ-Chairman tal-Fondazzjoni tal-Ajruport ta’ Malta Josef Formosa Gauci qal li hu ta’ sodifazzjoni li bl-għajnuna tagħhom, Wirt Artna setgħet twettaq ix-xogħol li kien hemm bżonn biex tagħti l-kumpless lura lill-pubbliku.
Huwa stqarr: “Hu pjaċir tagħna li qed naraw il-ftuħ tar-restawr li sar fil-kamra. Proġett li beda fl-2017, fejn il-fondazzjoni għenet lil Wirt Artna għall-proġett. Għalih allokajna €350,000, u hu proġett li naħsbu li se jkompli jtejjeb bil-kbir il-prodott turistiku tagħna.”
Il-kumpless sħiħ taħt l-art kien inbena mill-Ordni fl-1566, iżda kien jintuża mill-Kuruna bħala kwartieri tal-Gwerra mill-1941 ‘l hemm. Hawnhekk kienet tasal informazzjoni minn kmamar anċillari oħra fl-inħawi, biex strateġisti militari jkunu jistgħu jagħtu struzzjonijiet lill-militar u l-forzi navali f’Malta u minn Malta. Dan partikolarment fiż-żmien fejn il-Gżejjer Maltin sfaw vittma tal-attakki mill-ajru tal-Assi.
Il-kumpless kien eventwalment jintuża wkoll min-NATO fi żmien il-Kriżi tas-Swejz fl-1956, u l-kriżi tal-Missili f’Kuba fl-1962. Eventwalment kien ingħalaq fis-sebgħinijiet.
