Il-barracks ta’ Għajn Tuffieħa se jiġu trasformati f’ċentru amministrattiv u edukattiv għal min iżur il-Park tal-Majjistral.
Dan tħabbar propju fi żjara li l-Ministru għall-Artijiet u l-Implimentazzjoni tal-Programm Elettorali, Stefan Zrinzo Azzopardi għamel fuq il-lant tax-xogħol, fejn saħaq li l-Awtorità għall-Artijiet se tkompli tkun protagonista fi proġetti ta’ dan it-tip għall-benefiċċju tal-komunità Maltija.
“Fuq numru ta’ binjiet, proprjetà tal-Awtoritàà tal-Artijiet qed isir restawr b’kollaborazzjoni mal-Park tal-Majjistral, Din l-art ħelwa u Nature Trust. Dan hu mod kif jiġu riġenerati binjiet li għandhom valur storiku li kienu jintużaw għal-skop militari u issa ser jkunu jingħataw lin-nies. biex b’hekk ikun hawn faċilitajiet aqwa, hawnhekk ġewwa dan il-park.”
Il-Ministru żied jgħid li ser ikompli bid-djalogi tiegħu ma’ diversi Kunsilli Lokali u anke NGOs biex l-Gvern ikompli jinvesti fi proġetti ta’ riġenerazzjoni ta’ binjiet storiċi.
Preżenti kien hemm ukoll Darren Saliba, li ilu jmexxi l-Park tal-Majjistral għal dawn l-aħħar 15 il sena, li enfasizza fuq l-importanza ta’ dan il-proġett, u qal li dawn ix-xogħlijiet ser iservu b’mod edukattiv għaliex il-faċilitajiet se jkunu mgħammra apposta biex isiru l-attivitajiet neċessarji.
