Rekord ta’ artijiet u proprjetajiet mgħoddija lil SportMalta fl-2024 

Matul l-2024, dsatax-il proprjetà u artijiet għaddew mingħand l-Awtorità tal-Artijiet għal għand l-entità SportMalta biex, min-naħa tagħha, tkun tista’ tamministrahom u tgħaddihom lil għaqdiet sportivi biex jiżviluppaw faċilitajiet u jtejbu s-servizzi li joffru lill-isportivi Maltin u Għawdxin. 

Dan ħareġ minn tweġiba Parlamentari li l-Ministru għall-Artijiet u l-Implimentazzjoni tal-Programm Elettorali, Stefan Zrinzo Azzopardi, ta lid-Deputat Laburista Carmelo Abela. 

Mid-dettalji li ngħataw, jirriżulta li s-sena li għaddiet kienet l-aktar waħda li fiha għaddew proprjetajiet jew artijiet lil SportMalta fl-aħħar ħames snin. 

Dawn il-proprjetajiet u l-artijiet huma mifruxin ma’ Malta u Għawdex, fosthom f’Ħal Far, fejn hemm diversi artijiet li ġew mgħoddija biex bdiet titwettaq il-wegħda tat-trakka l-ġdida tal-Motorsport fl-aħħar xhur. 

B’kollox, fl-aħħar ħames snin, SportMalta ngħatat xejn inqas minn 51 proprjetà jew art mill-Awtorità tal-Artijiet biex, imbagħad, għaddiethom lil bosta għaqdiet.  

Sadanittant ħareġ ukoll li l-2024 kienet sena rekord għall-kuntratti ta’ fidi ta’ ċnus, li saru mill-Awtorità tal-Artijiet dwar proprjetajiet tal-Gvern.  

Fil-fatt l-Awtorità tal-Artijiet ikkonkludiet 214-il kuntratt ta’ fidi ta’ ċnus temporanji u 288 kuntratt ta’ fidi ta’ ċnus perpetwi.  

Dan ifisser total ta’ 502 kuntratti, waqt li, fis-sentejn ta’ qabel, dawn laħħqu l-490 kuntratt fl-2022 u 349 fl-2023. 

Dan fl-istess waqt li l-Awtorità tal-Artijiet, fl-aħħar sena, tat spinta qawwija lid-diġitilizzazzjoni tas-sistemi tagħha u għaddej proċess ta’ skennjar tal-fajls kollha tagħha.