B’rabta mar-rejd fil-Kwartieri Ġenerali tal-Partit Popolari Ewropew fi Brussell, li sar nhar it-Tlieta li għadda, l-awtoritajiet Ġermaniżi qed jinvestigaw kuntratti li jlaħħqu eluf kbar ta’ ewro.
Dawn il-kuntratti huma relatati ma’ Mario Voigt, li mexxa l-kampanja online ta’ Manfred Weber, fl-aħħar elezzjoni tal-Parlament Ewropew fl-2019.
Weber huwa l-ħabib tal-eks Kap Nazzjonalista Simon Busuttil, li ġie ingaġġat bħala s-Segretarju Ġenerali tal-partit.
Dan ir-rejd fil-kwartieri tal-EPP, li miegħu huwa affiljat il-Partit Nazzjonalista, seħħ minħabba inkjesta li għaddejja fil-Ġermanja dwar dawn il-kuntratti. F’dan ir-rejd, il-Pulizija ċċekkjat il-kompjuters, waqt li ħadet ritratti ta’ riċevuti, fost oħrajn.
Is-sit internazzjonali Euractiv irrapporta li l-għada tar-rejd saret interogazzjoni minn żewġ investigaturi Ġermaniżi u ieħor Belġjan. Ġie rrappurtat ukoll li fiż-żmien li ġej, se jkun hemm aktar interogazzjonijiet ma’ ħaddiema tal-Partit Popolari Ewropew.
Sors li kien preżenti għal dan ir-rejd, li tkellem mal-Euractiv qal li l-kuntratti bejn il-Partit Popolari Ewropew u l-kumpanija kienu jlaħħqu minn tal-anqas €300,000.
Dan ir-rejd ħalla ġenn sħiħ fil-partit Ewropew, hekk kif tħassret laqgħa tal-grupp li kellha ssir il-ġimgħa d-dieħla fil-Polonja.
Bosta li tkellmu mal-midja internazzjonali qalu li Weber ġab lil Voigt fil-kampanja elettorali fuq għażla personali tiegħu u waqt il-kampanja elettorali xejn ma seta’ jsir mingħajr l-approvazzjoni tiegħu.
Intqal ukoll li Weber għandu jġorr ir-responsabbilita politika dwar dan il-każ.
Weber, bħala President tal-partit, jaħdem mill-qrib ħafna wkoll mal-Ewroparlamentari Nazzjonalisti Roberta Metsola u David Casa.
