Għal sena oħra l-klabb tal-Birgu se jkun fost il-favoriti għar-rebħ tax-shield tal-Vitorja Kategorija A. Is-sena l-oħra l-ġirbin irritornaw għar-rebħ wara assenza ta’ 39 sena meta qasmu x-shield ma’ Bormla. F’Marzu li għadda ma rebħux ix-shield tal-Ħelsien għal żewġ punti biss. U għall-edizzjoni ta’ din is-sena tar-Regatta tal-Vitorja il-Birgu se jerġgħu joffru sfida lill-klabbs ta’ Bormla u l-Isla, bil-crews kollha ġew konfermati bl-eċċezjoni ta’ bidliet żgħar. F’kategorija A l-unika bidla kienet l-akkwist mingħand Kalkara tal-qaddief Rhys Fiteni li se jkun qed jikkompeti fil-frejgatina.
Il-qaddiefa kollha f’Kategorija A huma:
Tal-Midalji: Owen Żammit, Antoine Brignone, Wayne Xuereb u Sven Refalo.
Frejgatini: Kieron Żammit u Rhys Fiteni (Tmunier Zeshian Attard)
Ta’ bi Tnejn: Clyde Cutajar u Clayton Darmanin.
Kajjikki: Kieron Żammit u Nigel Sant.
Ta’ b’Erbgħa: Antoine Brignone, Clyde Cutajar, Clayton Darmanin u Sven Refalo.
Birgu rebbieħa ta’ Kategorija B u tax-shield tan-Nisa fir-Regatta ta’ Jum il-Ħelsien 2024
Birgu huma armati wkoll f’kategorija B fejn għal darb’oħra se jkunu qed jiskjeraw il-qaddiefa kollha tal-Under 18. Magħhom l-akkwist ġdidi Clifford Buġeja. F’Marzu li għadda il-klabb ġirbi rebaħ kategorija B meta ġab l-istess ammont ta’ punti daqs il-Kalkara. Il-qaddiefa kollha f’kategorija B huma:
Ta’ bi Tnejn: Lorenz Mizzi u Clifford Buġeja.
Kajjikki: Nayden Casha u Jayden Fisher.
Tal-Midalji: Nayden Casha, Adonai Gatt, Yann Parascandolo u Kurt Ellul.
Frejgatini: Lawson Cassar u Dion Caruana (Tmunier Eliah Azzopardi)
Ta’ b’Erbgħa: Shardon Cassar, Lorenz Mizzi, Clifford Buġeja u Kurt Ellul.
Birgu jibdew bħala favoriti wkoll fit-tiġrija għall-qaddiefa nisa, kompetizzjoni li ilhom jiddominaw għal dawn l-aħħar snin. Huma se jiskjeraw l-istess team rebbieħ: Shazel Grima u Glynis Mizzi (Tmunier Dale Scicluna).
L-attivita’ fil-klabb tar-Regatta tal-Birgu qed tkun waħda kbira hekk kif f’dawn l-aħħar snin reġa kien hemm qawmien ġdid. Klabb li wasal fl-aħħar fażi tal-binja tal-club house u maħżen ġdid u li kellu żieda qawija fil-membri u qaddiefa ġodda li resqu lejn il-klabb.
Għal jum ir-Regatta tal-Vitorja l-klabb tal-Birgu qed iħeġġeġ lill-partitarji sabiex isegwu it-tiġrijiet mill-Forti Sant Anġlu li se jkun miftuħ b’xejn għar-residenti kollha tal-Birgu.
Ir-Regatta tal-Vitorja se ssir nhar il-Ħadd 8 ta’ Settembru fil-Port il-Kbir. L-ewwel tiġrija tibda’ fin-12.30 ta’ wara nofs-in nhar.
