Għar-Regatta tal-Vitorja ta’ din is-sena, Kalkara se jkunu armati sew f’Kategorija B b’taħlita ta’ qaddiefa żgħażagħ u oħrajn stabbiliti. Fir-Regatta tal-Ħelsien f’Marzu li għadda, Kalkara ma rebħux ix-shield ta’ Kategoirja B għal żewġ punti biss. Għalhekk f’dawn l-aħħar xhur ħadmu sew sabiex jaraw li filwaqt li jżommu il-crews b’saħħithom li kellhom f’Marzu, jaraw fejn setgħu marru aħjar u jippruvaw iġibu lejn pajjiżhom unur importanti wara nuqqas ta’ ħafna snin.
Il-klabb ta’ Kalkara ikkonferma l-maġġoranza tal-qaddiefa li kellu. Magħhom ingħaqdu xi qaddiefa oħra bħal Rhys Fiteni, Ryan Degiorgio, Christian Bugeja u Clifford Bugeja. Se jagħtu wkoll ċans lil xi qaddiefa żgħażagħ prodott tal-klabb tagħhom stess.
F’Kategorija A il-klabb ta’ Kalkara se jieħu sehem fi tliet tiġrijiet.
Fil-Frejgatina se jikkompetu Rhys Fiteni u Jean Claude Cassar.
Fil-Kajjik se jaqdfu Jean Claude Cassar u Joseph Pace.
F’Ta’ b’Erbgħa, il-klabb klakariż iddeċieda li jagħti ċans lil erba’ qaddiefa prodott tal-klabb u li telgħu mill-kategorija U18. Xi ħaġa li se sservi ta’ esperjenza għalihom fl-ogħla kategorija tar-Regatta. L-erba’ qaddiefa se jkunu Owen Said, Kohath Mallia, Jake Galea u Jason Debono.
Kalkara jinsabu armati sew f’Kategorija B permezz ta’ dawn il-qaddiefa:
Tal-Midalji: Jonathan Piscopo, Christian Bugeja, Dorian Cilia u Clyde Aquilina.
Frejgatini: Kohath Mallia u Ryan Degiorgio.
Ta’ bi Tnejn: L-aħwa Gilmore u Godwin Buttigieg.
Kajjikki: Kurt Vassallo u Christian Bugeja.
Ta’ b’Erbgħa: Jonathan Piscopo, Gilmore Buttigieg, Clifford Bugeja u Malcolm Vella.
Ir-Regatta tal-Vitorja se ssir nhar il-Ġimgħa 8 ta’ Settembru fil-Port il-Kbir. L-ewwel tiġrija tibda fin-12:30.
Christian Grima
Clifford Bugeja
Dorian Cilia
Jonathan Piscopo
Malcolm Vella
Rhys Fiteni
Ryan Degiorgio
