Għas-sengleani r-Regatta tal-Vitorja għandha sinjifikat importanti. Avveniment li jiġi fil-festa tal-belt tagħhom u li għaldaqstant iżid fl-importanza tiegħu. Fil-passat il-klabb senglean dejjem kien protagonista, u wara xi snin nieqsa mir-rebħ tax-shield, l-Isla reġgħu ramaw sew b’team li qed jaspira li jkun għal darbżoġra protagonist.
F’Marzu li għadda, l-Isla kienu taw sfida lill-klabb ta’ Bormla għar-rebħ tax-shield ta’ Kategorija B. F’dik l-edizzjoni kellhom bidu mill-aqwa meta rebħu l-ewwel tiġrija, tal-Midalji. U fil-fatt, f’Kategorija A għar-Regatta tal-Vitorja, il-klabb senglean ikkonferma l-t-team ta’ qaddiefa li kellu fir-Regatta tal-Ħelsien. L-unika bidla żgħira se tkun fil-crew ta’ bi tnejn fejn Russell Buġeja se jingħaqad ma’ Glenn Żammit.
F’Tal-Midalji u f’Ta’ b’erbgħa ikkonfermat it-team li kellhom f’Marzu, bil-qaddiefa Glenn Zammit, Russell Buġeja, Glenn Gauci u Redeemer Rapa.
Fit-tiġrija tal-Frejgatini se jerġgħu jaqdfu Christian Camilleri u William Mifsud, filwaqt li fil-Kajjik senglean se jkun hemm Christian Camilleri u Nigel Sant.
F’Kategorija B se jingħata ċans lill-qaddiefa żgħażagħ. Dan hekk kif f’Lulju li għadda l-Isla rebħu r-Regatta U20 li saret ir-Rinella. Konferma ta’ kemm il-klabb hu ħaj u li qed irawwem qaddiefa ġodda. Fl-istess ħin klabb li qed iħares lejn il-futur.
Il-qaddiefa f’din Kategorija B huma dawn:
Tal-Midalji: Cayvon Gatt, Clyde Debattista, Ericsen Lia u Owden Caruana Smith.
Frejgatina: Cayvon Gatt u Owden Caruana Smith.
Ta’ bi Tnejn: Marlon Cutajar u Kevin Camilleri.
Kajjik: Cayvon Gatt u Ericsen Lia.
Ta’ b’Erbgħa Clifford Buġeja, Marlon Cutajar, Brolin Genovese u Kevin Camilleri.
Is-sengleani se jieħdu sehem ukoll fit-tiġrija tan-Nisa permezz ta’ Brooke Stivala u Aaliyah Bonello.
F’dawn l-aħħar xhur kompliet ukoll il-ħidma fil-maħżen tal-klabb. Saret manutenzjoni fuq l-opri tal-Midalji u l-Frejgatina filwaqt li beda l-bini ta’ Kajjik ġdid.
Ir-Regatta ta’ Jum il-Vitorja se ssir nhar il-Ħamis 8 ta’ Settembru fil-Port il-Kbir. L-ewwel tiġrija mistennija tibda fis-13.00.
