Il-Marsa huma l-holders tar-Regatta tal-Vitorja hekk kif rebħu l-aħħar edizzjoni li saret sentejn ilu. Biss din id-darba se jkunu qed jiffukaw fuq Kategorija B wara li dan l-aħħar iffaċjaw xi diffikultajiet.
Problemi li huma marbuta mal-maħżen li l-klabb tal-Marsa għandu l-Menqa. Maħżen li apparti li jinsab fi stat ħażin, għad ma ġiex konfermat mill-awtoritajiet jekk hux se jiġi mġedded iċ-ċens tiegħu. Din l-inċertezza dwar il-futur tal-maħżen qed iżżomm lil bosta nies li lesti jinvestu fil-klabb sabiex jibqgħu lura milli jagħmlu dan. Inċertezza li waslet ukoll għal apatija tant li naqas l-interess u l-involviment fil-klabb marsi.
Il-kumitat marsi qed jappella lill-awtoritajiet sabiex jgħinu lill-klabb tar-Regatta, klabb li naqqax ismu fuq ix-shield tal-Vitorja għal bosta drabi u li tkun ħasra jekk dak kollu li sar fil-passat jisfuma fix-xejn. L-appell qed isir ukoll lill-poplu kollu tal-Marsa sabiex jgħin lill-klabb f’dawn il-mumenti diffiċli.
Għar-Regatta tal-Vitorja ta’ din is-sena, f’kategorija A, il-Marsa se jieħdu sehem biss fit-tiġrija tal-Kajjikki bil-qaddiefa Lino Fabri u Gilbert Grech.
F’Kategorija B se jikkompetu f’erba’ mill-ħames tiġrijiet. L-unika tiġrija li mhux se jieħdu sehem fiha hija dik Ta’ bi Tnejn. Il-bqija dawn huma l-qaddiefa li jikkompetu għall-klabb marsi:
Tal-Midalji: Kerstin Brown, Elston Stivala, Larkin Marchett u Emerson Spiteri.
Frejgatina: Kerstin Brown & Elston Stivala.
Kajjik: Josef Dalli & Axel Degiorgio.
Ta’ b’Erbgħa: Kerstin Brown, Elston Stivala, Larkin Marchett u Emerson Spiteri.
Ir-Regatta ta’ Jum il-Vitorja se ssir nhar il-Ħamis 8 ta’ Settembru fil-Port il-Kbir. L-ewwel tiġrija mistennija tibda fis-13.00.
