• Busuttil lagħab l-aħħar karta biex ma nkunux nafu l-accounts tal-PN qabel l-elezzjoni ġenerali
Fl-aħħar jiem il-Partit Nazzjonalista reġà nqabad f’attentat iddisprat ta’ ħabi. Ħabi ta’ flus bi ksur tal-liġi tal-finanzjament tal-partiti. Mhux dnub tal-abbatini, iżda qerq sfaċċat ta’ partit li f’25 sena ma daħħalx din il-liġi, u li dejjem ħeba l-kontijiet tiegħu.
Bil-liġi tal-finanzjament tal-partiti, kull partit reġistrat irid jgħaddi l-kontijiet tiegħu lill-Kummissjoni Elettorali, wara proċess ta’ verifika indipendenti, sa 4 xhur wara li tagħlaq is-sena finanzjrja. Għall-Partit Nazzjonalista, l-appuntament kien għall-aħħar t’April. Iżda l-kontijiet baqgħu mistura.
Din kienet l-ewwel okkażjoni biex jinkixef l-istat finanzjarju tal-Partit Nazzjonalista. Kien se joħroġ fil-beraħ id-dejn li ħakem id-Dar Ċentrali wara 25 sena fil-Gvern. Kienu se jitwieġbu l-mistoqsijiet ta’ kif il-Partit Nazzjonalista spiċċa fallut eżatt kif tilef ir-riedni tal-Gvern. Konna se nkunu nafu s-self li bih mgħobbija l-istamperija, inkluż l-iskema ċedoli li minnha nfisha toħnoq it-trasparenza u tmur kontra l-ispirtu tal-liġi tal-finanzjament tal-partiti. Konna niskopru wkoll minn fejn ġejjin id-donazzjonijiet u kif qed jitħallsu l-pagi.
Iżda l-Partit Nazzjonalista ma jridx jikxef idu qabel l-elezzjoni ġenerali. Dejjem ħeba l-manuvri finanzjarji tiegħu, u mhux se jinbidel issa. Speċjalment wara li nqabad jiffroda l-Unjoni Ewropea biex iħallas il-paga ta’ John Zammit, u nqabad jigdeb fuq id-donazzjonijiet tad-db li bihom ħallas il-paga ta’ Rosette Thake u Brian St. John.
Għalhekk ħarab mill-obbligi legali tiegħu u ppersista mal-Kummissjoni Elettorali biex jipposponi għal wara l-elezzjoni ġenerali. Fuq parir tal-espert kostituzzjonali Ian Refalo, il-Kummissjoni Elettorali aċċettat li testendi b’xahar u nofs sas-17 ta’ Ġunju. Dan anke jekk il-liġi titkellem fuq massimu ta’ sebat ijiem.
Il-Partit Nazzjonalista ma kellu bżonn l-ebda estenzjoni biex jivverifika l-kontijiet tiegħu u jippubblikahom. Irrikorra għal din il-manuvra għaliex il-kultura tal-gideb u l-ħabi hija minsuġa fl-għeruq tad-Dar Ċentrali.
Dan hu l-istess partit li kien jopera l-famuża JS List, biex il-kuntratti tal-Gvern jingħataw lil donaturi Nazzjonalisti. L-istess partit li f’25 sena ma daħħalx il-liġi tal-finanzjament tal-partiti, biex issa daħħal l-iskema ċedoli li biha jaħbi d-donaturi tiegħu f’forma ġdida tal-JS List. Partit li hu mifni bid-dejn u li għal flus jagħmel kollox, anke jiffroda lill-Unjoni Ewropea.
Pagi PN: jinħbew wara l-qorti
Il-qerq u l-ħabi ma jiqafx hemm. Il-Partit Nazzjonalista mhux biss qed jaħbi u jikser il-liġi biex ma jippubblikax il-kontijiet, imma qed jagħmel minn kollox biex ma jkunx investigat. Wara li fetaħ kawża biex iwaqqaf il-Kummissjoni Elettorali milli tinvestigah fuq l-iskandlu tad-donazzjonijiet tad-db, il-Partit Nazzjonalista reġà rrikorra għax-xibka tal-qerq biex irnexxielu jiddeferixxi s-smigħ tal-kawża għall-aħħar ta’ Settembru.
F’dan l-iskandlu, magħruf aħjar bħala Pagi PN, il-Kummissjoni Elettorali ħatret lill-eks imħallef Jeffrey Valencia biex imexxi investigazzjoni fuq donazzjonijiet mhux dikjarati u ksur sfaċċat tal-liġi tal-finanzjament tal-partiti. Simon Busuttil inqabad jigdeb meta ċaħad li kienu donazzjonijiet, u meta ġie għall-fatti ħarab milli jippubblika l-famużi invoices għal servizz li suppost sar. Ħarab għax gideb, u gideb biex jaħbi.
F’disprament biex isalva ġildu, il-paladin tal-politika onesta fetaħ kawża kontra l-Kummissjoni Elettorali li kellha tinstema’ l-Ħamis li għadda. Iżda minflok deher quddiem l-Imħallef Joseph Zammit McKeon, il-Partit Nazzjonalista bagħat lil Therese Comodini Cachia biex inkiss inkiss, iddiferixxa l-kawża għal wara l-elezzjoni. Oħroġ il-għaġeb, Comodini Cachia wieġbet li m’hemmx għaġla meta l-Imħallef staqsa jekk għandhiex oġġezzjoni għad-diferiment.
B’hekk il-Partit Nazzjonalista laħaq it-tragward tiegħu li jtawwal u jxekkel l-investigazzjoni waqt li fil-frattemp ikompli jaħbi flusu. L-istess nies li jippriedkaw il-poltika onesta u t-trasparenza, jipprattikaw il-politika tal-qerq u l-ħabi għaliex għalihom li jiggvernaw hu dritt divin.
