L-Aġenzija Żgħażagħ nediet studio għar-rehearsals/recording biex l-artisti żgħażagħ jipprattikaw u jirrekordjaw id-diski tagħhom, waqt preżentazzjoni ta’ premjijiet lir-rebbieħa tal-iskema Music Quest.
Is-Segretarju Parlamentari Clifton Grima li kien preżenti għal din it-tnedija, qal li “Aġenzija Żgħażagħ bħal dejjem tkun proattiva u pjattaforma biex inressqu ’l quddiem u nippromwovu t-talenti taż-żgħażagħ tagħna”. Permezz ta’ programmi bħal Music Quest, dawn l-artisti jikkontribwixxu għal ċittadinanza proattiva u kreattiva, bit-tama li żgħażagħ oħra b’ispirazzjonijiet simili, jiġu ispirati għal proġetti artistiċi oħra. Dr Clifton Grima ħeġġeġ liż-żgħażagħ li ħadu sehem f’din l-iskema biex iħeġġu aktar żgħażagħ jipparteċipaw.
Id-Direttur Eżekuttiv ta’ Aġenzija Żgħażagħ Miriam Theuma qalet li din l-aġenzija se tipprovdi spazju għall-iżvilupp tal-artisti u taż-żgħażagħ permezz tal-music studio fejn l-artisti żgħażagħ se jingħataw l-opportunità li jirrekordjaw il-mużika tagħhom fi studioprofessjonali. Qalet ukoll li permezz tal-iskema Music Quest “se nkomplu ngħinu liż-żgħażagħ li jieħdu l-impenn biex nagħtuhom l-għajnuna ħalli jkomplu l-karriera tagħhom”.
Music Quest ġiet introdotta biex tappoġġja liż-żgħażagħ li qed jippruvaw isiru artisti fix-xena mużikali Maltija. L-iskema hi maqsuma f’żewġ fażijiet: fażi 1 tibbaża fuq konsulenza u appoġġ permezz ta’ Aġenzija Żgħażagħ li tagħti appoġġ lill-applikanti f’diversi oqsma bħal: kitba tal-kanzunetti, apprezzament tal-mużika u organizzazzjoni ta’ workshops dwar is-suġġetti meħtieġa. Din l-assistenza tagħti lill-artisti u lill-bands l-għodda meħtieġa biex jikkomponu u jirreġistraw demo oriġinali. Fażi 2 hi miftuħa għall-artisti u għall-gruppi żgħażagħ żgħar li jixtiequ jaġġornaw il-profil tagħhom tal-mużika.
Ir-rebbieħa ta’ Music Quest kien il-grupp The PlaKard Project bid-diska ‘Chilly Love’, liema grupp se jibbenefika minn bosta opportunitajiet, fosthom għotja ta’ €1,000 biex jirrekordja d-diska, kif ukoll se jkollu ċ-ċans jesebixxi t-talent tiegħu fil-Farsons Beer Festival.
