Hibernians irreġistraw it-tieni rebħa konsekuttiva meta ghelbu lil Sirens 2-1 bil-goals kollha jaslu matul l-ewwel taqsima. B’dan ir-rizultat Hibernians qabżu lil Birkirkara u Marsaxlokk biex telghu fir-raba’ post tal-klassifika.
Mill-banda l-oħra, din it-telfa prattikament ikkundannat lil Sirens, li ghalkemm matematikament ghadhom mhumiex relegati, pero’ jidher li miraklu biss jista’ jeħlishom milli jitilfu posthom fil-Kampjonat Premier.
Għalkemm fetħu sa minn kmieni fuq l-attakk, Hibernians kellhom jistennew sat-22 minuta sabiex jiżblukkaw ir-riżultat meta minn corner mogħti minn Giannis Bastianos, Ferdinando Apap bir-ras ra l-ballun jaħbat mal-lasta qabel spiċċa fix-xibka.
Żewġ minuti biss wara Sirens spiċċaw jilgħabu bi player anqas meta r-referee Malcolm Spiteri wera karta ħamra diretta lil Gilberto Martins li deher ixejjer daqqa lill-goalkeeper Kone mingħajr ballun.
Iżda minkejja l-iżvantaġġ numeriku, Sirens ma qagħdux lura u fis-37 minuta huma skurjaw il-goal tad-draw permezz ta’ Degran Jackson li temm azzjoni bejn diversi plejer b’xutt mill-isbaħ li spiċċa fl-anglu u għeleb għal kollox lill-Kone għal 1 – 1.
Sirens saħansitra pprotestaw għal penalty fit-42 minuta meta Andreas Panayiotou deher jaqa’ fil-kaxxa f’kuntrast li kellu mal-goaler Kone, imma r-referee ħalla l-logħob għaddej.
Hibernians reggħu skurjaw proprju fil-ħin miżjud qabel intemmet l-ewwel taqsima meta Ferdinando Apap qassam lil Giannis Bastianos li fajjar xutt minn tarf il-kaxxa li spiċċa fis-saqaf tax-xibka.
Fit-tieni taqsima Hibernians ikkontrollaw tajjeb is-sitwazzjoni u kellhom xi okkażjonijiet fejn setgħu kabbru l-vantaġġ, waqt li Sirens qatt ma rnexxielhom jirkupraw mill-goal li sofrew eżatt qabel il-mistrieħ tant li ma tawx xutt wieħed denju għall-kumplament tal-logħba.
Fis-57 minuta Jurgen Degabriele falla ċans tajjeb li jkabbar il-vantaġġ għal Hibernians imma xxuttja barra minn qagħda tajba minn pass ta’ Ferdinando Apap.
L-istess Degabriele reġa’ xxuttja barra fl-64 minuta minn pass ta’ Sime Zuzul.
L-aħħar ċans għal Hibernians wasal fis-70 minuta minn freekick mogħti minn Degabriele imma Apap naqas li jolqot tajjeb minn qagħda ideali.
Referee: Malcolm Spiteri
Plejer tal-Logħba: Giannis Bastianos (Hibernians FC)
