Goal skurjat mis-sostitut Lucas Silva Sena fil-75 minuta ta’ rebħa u tliet punti ferm prezzjużi lil Santa Lucia fit-taqtiegħa kontra r-relegation, filwaqt Ii kien daqqa ta’ ħarta għal Balzan fit-tentattiv li jitbegħdu miż-żona l-ħamra.
Matul l-ewwel taqsima assistejna għal xi azzjonijiet denji ta’ nota b’Santa Lucia joħolqu l-ewwel azzjoni fit-tieni minuta meta kross insidjuż ta’ Alessio Piazza għadda tul il-lasta u mar barra.
Balzan wieġbu fl-10 minuta b’xutt tajjeb fil-baxx ta’ Andre Prates li l-goaler Da Paz salva f’corner. Minuta wara kien Ryohei Michibuchi għal Balzan li ra x-xutt tiegħu jigi kklerjat fuq il-linja minn Jurgen Pisani.
Fit-13-il minuta xutt mill-bogħod ta’ Daniel Letherby għal Santa Lucia deher jaħbat mal-lasta l-mimduda qabel spiċċa barra.
Santa Lucia reġgħu resqu qrib fis-26 minuta meta freekick mogħti minn Fabian Moracci għadda sbrixx minn fuq il-lasta l-mimduda.
Fit-tieni taqsima l-logħba baqgħet bilanċjata iżda Santa Lucia dehru xi ftit aktar perikolużi tant li ħolqu l-ewwel periklu fil-55 minuta meta kross ta’ Lucas Sena seta’ ġie sfruttat aħjar imma Aleksa Mrdja naqas li jikkonkludi.
Assistejna għal ħafna logħob f’nofs il-ground sakemm fil-75 minuta wasal il-goal tar-rebħa għal Santa Lucia meta Evandro Pinto Gomes ikkrossja għan-nofs u s-sostitut Lucas Silva Sena spara xutt li ħabat mal-mimduda qabel spiċċa fix-xibka.
Balzan ippruvaw iwettqu reazzjoni fit-tentattiv li jsalvaw ir-riżultat imma l-aktar li resqu qrib kien fid-90 minuta meta xutt ta’ Manyluak Aguek ġie mblukkat tajjeb mill-goaler Da Paz.
Referee: Fyodor Zammit
BOV Plejer tal-Logħba: Evandro Pinto Gomes (Sta Lucia)
