Marsaxlokk kisbu rebħa mnima iżda ferm meritata ta’ 1-0 kontra Hibernians, f’partita iżda li fiha li kieku kienu iktar preċiżi fl-attakk, l-iskor seta’ saħansitra kien ikbar favurihom. Ta’ nota huwa l-fatt li għat-tieni partita konsekuttiva għal Marsaxlokk reġa’ ddefenda l- lasti l-goalkeeper Matthew Calleja Cremona wara tluq tal-goalkeeper Serb Marko Drobnjak.
Kienu Hibernians li ħolqu l-ewwel periklu fit-12-il minuta meta l-captain Bjorn Kristensen kellu xutt mid-distanza li għadda għoli.
Marsaxlokk wieġbu ħames minuti wara permezz ta’ xutt ieħor mid-distanza din id-darba tas-Slovakk Martin Adamec li wkoll intemm għoli. Huma komplew jiddettaw il-logħob u fit-23 minuta xutt dijagonali tall-player mill-Georgia Sergo Kukhianidze għadda ftit barra.
Hibernians wieġbu fid-39 minuta u resqu qrib li jiftħu l-iskor meta Jurgen Degabriele b’eleganza indirizza xutt lejn is-saqaf tax-xibka iżda sab lil Calleja Cremona attent li salva f’corner b’mod stupend.
Iżda kontra x-xejra tal-logħob u meta konna qed nistennew it-tisfira tar-referee Ishmael Barbara għal tmeim l-ewwel taqsima, Marsaxlokk fetħu l-iskor meta wara li rċieva minn cross pinġut, ALEX DE AGUILAR GOMES, kien fil-post it-tajjeb fil-mument opportun u peremzz ta’ tap-in mill-viċin tefa’ ġewwa, biex b’hekk irnexxielu jsib ix-xibka għat-tielet darba konsekuttiva wara li fil-match-day preċedenti kien irreġistra doppjetta personali fir-rebħa ta’ 3-1 kontra Zabbar SP fl-aħħar mumenti tal-partita.
Fid-49 minuta, Marsaxlokk appellaw għall-penalty meta Alex De Aguilar Gomes kellu xutt li deher li ħabat ma’ id il-player ta’ Hibernians Kurt Shaw, iżda r-referee Ishmael Barbara ħalla l-logħob għaddej.
L-intensitá fil-logħba kompliet tikber u ħames minuti wara Yuri De Jesus Messias għadda tajjeb lejn id-debuttant, ex Hamrun, Jorge Ailton Soares li kellu x-xutt tiegħu salvat tajjeb mill-goalkeeper żagħżugħ tal-Pawlisti, Hugo Sacco.
Huma komplew fuq l-offensiva u fil-65 minuta, is-solitu Yuri De Jesus Messias temm azzjoni personali billi kellu xutt imblukkat mid-difensur internazzjonali tal-Pawlisti, Kurt Shaw.
Kulma jmur kompla l-assedju tax-Xlukkjari fuq il-lasti tal-Pawlisti u fis-76 minuta Jorge Ailton Soares kellu x-xutt tiegħu devjat f’corner minn difensur tat-tim minn Raħal Ġdid.
Marsaxlokk komplew jippressaw u żewġ minuti biss wara, Yuri De Jesus Messias kellu xutt fil-baxx salvat f’corner minn mal-art minn Sacco.
Huma komplew jamministraw il-vantaġġ minimu li kellhom sa tmiem il-partita.
Referee: Ishmael Barbara
Plejer tal-Logħba: Alex De Aguilar Gomes (Marsaxlokk FC)
