Permezz ta’ wirja konvinċenti għakemm b’mod strett, Sliema Wanderers għelbu l-isfida ta’ Mosta bl-iskor minimu ta’ 1-0. Dan mingħajr wieħed ma jneħħi xejn mill-wirja pożittiva ta’ Mosta li offrew oppożizzjoni denja lill-Wanderers tul id-90 minuta, fejn sabu lill-goalkeeper tal-Wanderers, Kelvin Emeka Agu f’vena mill-aqwa.
Din kienet it-tieni rebħa konsekuttiva għall-Wanderers fil-Malta Premier u t-tielet waħda infila jekk wieħed iqis il-Meridianbet FA Trophy, b’Mosta jsofru t-tieni telfa konsekuttiva fil-kampjonat.
Kienu Sliema li ħolqu l-ewwel periklu fl-20 minuta meta xutt ta’ Myles Beerman għadda għoli.
Żewġ minuti biss wara daqqa ta’ ras tal-istess Beerman ġiet salvata mill-goalkeeper ta’ Mosta, David Udoh Akpan.
Mosta wieġbu għall-ewwel darba fit-28 minuta meta Sunday Okereke xeħet cross li sab lil Joshua Agyemang li kellu t-tentattiv tiegħu salvat bi bravura minn Agu.
L-aħħar kwarta tal-ewwel taqsima kienet ferm kwieta u nieqsa minn kull emozzjoni, ikkaratterizzata minn ħafna logħob f’nofs il-ground u biż-żewġ timijiet jonqsu milli joħolqu xi tip ta’ periklu fuq il-lasti avversarji.
Fil-ftuħ tat-tieni taqsima, Sliema ħarġu ferm aggressivi u fit-52 minuta, fetħu l-iskor meta freekick insidjuż tal-ispeċjalista Steve Pisani stampa mal-lasta, biex mir-rebound pront kien l-iskorer prolifiku Sloven VITO PLUT li bir-ras mill-viċin tefa’ ġewwa.
Iżda Mosta ma rmewx ix-xugaman anzi wettqu reazzjoni tajba u ħames minuti wara is-sostitut Fillandiż Sakari Salomo Ojala ġie wiċċ imb’wiċċ ma’ Agu, qabel ra lil dan tal-aħħar isalva bi bravura.
Huma komplew jiddettaw il-logħob fit-tentattiv li jġibu l-iskor indaqs u fit-68 minuta Prince Afriyie avvanza tajjeb qabel kellu x-xutt b’saħħtu tiegħu li ħareġ l-aħjar ta’ Agu li reġa’ salva lis-Slimiżi.
Madankollu, kienu Sliema li reqsu qrib li jkabbru l-iskor fit-80 minuta meta xutt mill-ewwel ta’ Adam Magri Overend għadda jħakkek ma’ sieq il-wieqfa, b’Mosta jeħilsuha ħafif.
Fil-ħin miżjud freekick tas-solitu Steve Pisani dejjem għall-Wanderers għadda ftit għoli.
Il-partita kienet għadha ma ntemmitx hawn u fit-93 minuta, Mosta resqu viċin li jġibu l-iskor indaqs ‘in extremis’ meta wara li rċieva minn azzjoni ta’ corner mogħti minn Clayton Failla, Joao Victor Teixeira, kellu d-daqqa ta’ ras tiegħu tiġi salvata f’corner minn Agu.
Referee: Ezekiel Barbara
Plejer tal-Logħba: Jean Borg (Sliema W).
