Hamrun Spartans kisbu rebħa minima ta’ 1-0 kontra Marsaxlokk. B’hekk huma kkonsolidaw posthom fil-quċċata tal-klassifika b’20 punt – punti ndaqs daqs Floriana. Kien mistenni iktar mill-Ispartans, meta wieħed iqis il-kwalitá ta’ players li huma jippossjedu, b’Marsaxlokk, għal ħinijiet twal joħolqu pressjoni fuq id-difiża avversarja.
Kienu l-Ispartans li ħarġu fuq l-offensiva u wara biss ħames minuti, Ryan Camenzuli kellu xutt mid-distanza li għoddu qarraq bil-goalkeeper Serb tax-Xlukkajri, Marko Drobnjak, li iżda salva tajjeb. Huma komplew jippressaw u fil-11-il minuta, minn azzjoni ta’ corner, Roko Prsa kellu t-tentattiv tiegħu devjat f’corner minn Drobnjak.
Kellna nistennew sal-aħħar ħames minuti tal-ewwel taqsima biex naraw azzzjoni oħra perikoluża meta Hamrun rebħu penalty hekk kif Weder Soares Da Silva waqqa’ lil Luke Montebello fil-kaxxa. Mill-11-il metru, inkariga ruħu, l-istess Montebello li ma żbaljax meta permezz ta’ xutt fil-baxx tefa’ lil Drobnjak, naħa u l-ballun in-naħa opposta, b’dan ikun is-seba’ goal staġjonali għall-iskorer prolifiku Malti.
Fil-ftuħ tat-tieni taqsima, Marsaxlokk, ħarġu ferm aggrssivi fit-tentattiv ovvju li jġibu l-iskor indaqs u wara tlett minuti Sunday Akinbule kellu x-xutt mill-ewwel tiegħu minn pożizzjoni ideali jgħaddi jħakkek mal-wieqfa.
Fid-69 minuta Hamrun Spartans, tilfu ċans tad-deheb li jirduppjaw l-iskor meta l-awtur tal-uniku goal Ħamruniż Luke Monetbello għadda tajjeb lejn Ryan Camenzuli li kellu x-xutt mill-ewwel tiegħu jintemm ftit għoli. Erba minuti wara l-Spartans reġgħu resqu viċin li jsibu x-xibka għat-tieni darba meta Ognjen Bjelicic ra lil Drobnjak barra minn postu, u ttanta xortih permezz ta’ xutt angulat mid-distanza li iżda għadda jħakkek mal-wieqfa.
Marasaxlokk tilfu opportunitá kbira li jġibu l-iskor indaqs fit-88 minuta meta Yuri De Jesus Messias, minn taħt il-lasta tefa’ inkreddibilment barra wara cross perfett mil-lemin. Fl-aħħar sekondi tal-partita, l-istess Yuri De Jesus Messias tilef ċans tad-deheb ieħor għax-Xlukkari meta kellu t-tnettaiv tiegħu jintemm ftit barra.
L-Ispartans komplew jikkonsolidaw il-vantaġġ minimu li kellhom sa tmiem il-partita.
Referee: Andrea Sciriha
Plejer tal-Logħba: Luke Montebello
