Quddiem stadium ippakkjat, Malta ġiet megħluba 4 – 0 mill-Ingilterra fit-tielet partita ta’ Grupp C ta’ kwalifikazzjoni mill-Kampjonati Ewropej 2024.
Kif mistenni l-Ingilterra ddominaw il-konfront mill-bidu sal-aħħar u meritatament rebħu l-partita. Għat-tim nazzjonali Malti din kienet bla dubju partita diffiċli ħafna hekk kif l-avversarji kienu teritorjalment dejjem fil-kontroll ta’ kull sitwazzjoni.
Fl-ewwel azzjoni tal-partita, l-Ingilterra marru fil-vantaġġ meta fil-8 minuta Bukayo Saka krossja għan-nofs u Ferdinando Apap, fit-tentattiv li jtajjar il-periklu tefa’ l-ballun fix-xibka ta’ Malta.
Fit-23 minuta free-kick ta’ James Maddison bil-goalkeeper Bonello jsalva bla wisq diffikulta.
Ħames minuti wara l-Ingilterra rduppjaw meta f’azzjoni veloċi l-konklużjoni ta’ Maddison ġiet imblukkata minn Borg, il-ballun ġie għand Alexander Arnold li b’xutt b’saħtu d-depożita l-ballun fix-xibka Maltija għal 2 – 0.
Sekondi biss wara Malta s-sofri t-tielet gowl.
Kien eżatt man-nofs siegħa logħob fejn kelna xutt b’saħtu ta’ Declan Rice ġie salvat minn Bonello li ma’ żammx, daħal Harry Kane li ġie imwaqqa minn Matthew Guillaumier u hawnhekk l-Ingilterra ġew mogħtija penalty. Mill-11 il-metru l-attakant ta’ Tottenham, Kane, ma’ falliex u għamel lis-skor 3 – 0.
Fl-aħħar mumenti tal-ewwel taqsima l-Ingilterra mill-ġdid perikolużi meta konklużjoni ta’ Saka ġiet salvata parzjlament minn Bonello.
Ma’ kważi siegħa logħob l-Ingliżi mill-ġdid perikolużi b’konklużjoni fil-baxx ta’ Kane li għaddiet ftit barra.
Minn hawn il-quddiem l-Ingilterra ta’ Southgate naqset mir-ritmu b’numru ta’ sostituzzjonijiet li iżda xorta baqaw fil-kmand tal-konfront.
Tmien minuti mit-tmiem l-Ingilterra ingħataw penalty ieħor meta kross tas-sostitut Marcus Rashford ħabat ma’ id Steve Borg u r-referee Pajec, wara li k-konsulta mal-VAR, ordna penalty. Mill-11 il-metru s-sostitut Callum Wilson kabbar il-vantaġġ u s-siġġilla r-rebħa għal 4 – 0.
Din kienet it-tielet telfa minn daqstant partiti għal Malta f’dan il-grupp.
Attendenza -16,277
Il-partita kienet ikkontrollata mill-Kroat Igor Pajec.
Ritratt: Domenic Aquilina
