Balzan għamlu pass importanti lejn is-salvazzjoni meta kisbu rebħa konvinċenti ta’ 4-1 fuq Sirens, li flimkien ma’ Gudja United diga’ sfaw relegati.
Balzan fetħu fuq l-attakk għalkemm kellna nistennew sat-18-il minuta biex nassistu għall-ewwel azzjoni denja meta l-goalkeeper tas-Sirens Andrea Cassar tajjar bil-ponn freekick insidjuż ta’ Andreja Aleksic.
Fil-31 minuta Cassar rega’ wettaq save tajjeb fuq xutt mill-bogħod ta’ Triston Caruana. Mir-rebound Aleksic ġie mwaqqa’ fil-kaxxa minn Hasan Gomda, bir-referee Philip Farrugia jsaffar ghal penalty, iżda l-assistant referee Mark Ciantar indika li l-ballun kien diġa’ mar barra qabel ħadu Aleksic u minflok ingħata corner.
Balzan pero’ fetħu l-iskor fis-36 minuta meta George Blackwood approfitta minn indeċiżjoni fid-difiża u skorja fil-baxx.
Fit-42 minuta l-istess Blackwood kellu xutt mill-qrib salvat f’corner minn Cassar, waqt li n-naħa l-oħra f’attakk iżolat tas-Sirens, mill-cross ta’ Daniel Agius, Andreas Panayiotou kellu d-daqqa ta’ ras imxellfa f’corner minn plejer avversarju.
Balzan komplew jiddominaw anke fit-tieni taqsima bl-ewwel azzjoni joħolquha fil-50 minuta meta xutt ta’ Olivier Rommens ħabat ma’ sieq il-lasta.
Fil-65 minuta huma rduppjaw meta minn corner mogħti minn Jan Busuttil, George Blackwood mill-qrib spara l-ballun fix-xibka.
Balzan kienu għoddhom żiedu goal ieħor fit-73 minuta meta xutt mill-bogħod ta’ Nikola Braunovic ħabat mal-lasta l-mimduda u mar barra.
Minuta wara kienu Sirens li laqtu sieq il-lasta permezz ta’ Prosper Boakye, bl-istess Sirens jerġgħu jersqu qrib fit-80 minuta meta xutt ta’ Charles Agyemang laqat il-mimduda wkoll.
Fit-82 minuta Balzan skurjaw it-tielet goal li wasal minn auto-goal ta’ Nicholas Pulis li tefa’ fix-xibka tiegħu stess fit-tentattiv li jimblokka xutt ta’ Olivier Rommens.
Balzan għamluhom 4-0 fis-86 minuta meta ngħataw penalty għal hands ta’ Konstantinos Ntampizas fil-kaxxa biex mll-11-il metru George Blackwood għaqqad hat-trick.
Sirens skurjaw goal ta’ konsolazzjoni fit-92 minuta permezz ta’ Prosper Boakye.
Referee: Philip Farrugia
BOV Plejer tal-Logħba: George Blackwood (Balzan)
