Fl-ewwel logħba fl-istadium nazzjonali Ta’ Qali Marsaxlokk għelbu lil Valletta bl-iskor ta’ 2-0. B’din ir-rebħa ix-xlukkajri telgħu fir-raba’ post tal-klassifika. Min-naħa tagħhom Valletta komplew jinżlu dejjem aktar l-isfel fl-istess klassifika meta issa jinsabu it-tielet mill-aħħar.
Marsaxlokk kienu l-aħjar team fl-ewwel taqsima, filwaqt fit-tieni waħda għarfu jikkontrollaw sew lill-beltin li min naħa tagħhom kellhom wirja oħra diżappuntanti.
Wara tliet minuti cross mix-xellug ta’ Yuri Messias lejn Duane Bonnici ta’ Marsaxlokk b’dan ta ballun għan-nofs u perikoluż quddiem il-lasta beltija, bid-difiża ta’ Valletta tajjret b’xi mod il-periklu. Ħames minuti wara Marsaxlokk marru fil-vantaġġ meta minn cross mil-lemin ta’ Nevin Portelli, daqqa ta’ ras mill-viċin ta’ Yuri Messias spiċċat fix-xibka għal 1 – 0.
Risposta ta’ Valletta fis-16 il-minuta meta mix-xellug kien Victor Luiz Prestes Filho li kkrossja għan-nofs, pero l-ebda plejer belti ma konkluda, bid-difiża xlukkajra ikklerjat il-ballun.
Marsaxlokk jersqu viċin fil-22 minuta b’xutt ċentrali ta’ Jose Fernando Gomes bil-goalkeeper Guarnone salva f’żewġ tentattivi. Dan sabiex fit-23 minuta Marsaxlokk jagħmluhom tnejn meta f’azzjoni veloċi xlukkajra li qabdet id-difiża beltija fuq sieq waħda, azzjoni mibdija minn Anthony Obonogwu li kompla lejn Nevin Portelli li waħdu quddiem il-lasta ma falliex u għamel l-iskor 2 – 0.
Eżatt qabel tmiem l-ewwel taqsima azzjoni perikoluza beltija meta minn cross mil-lemin ta’ Diego Paiber, xutt minn tarf il-kaxxa ta’ Shaun Dimech bil-ballun ħabat ma’ sieq il-lasta, mir-rebound kien hemm konklużjoni ta’ Diego Cardoso Nogueira li ġiet ikklerjata mid-difiża ta’ Marsaxlokk.
L-azzjonijiet fit-tieni taqsima kienu ftit b’Marsaxlokk kienu fil-kontroll ta’ kull sitwazzjoni.
Mas-siegħa logħob xutt angolat ta’ Diego Cardoso ta’ Valletta għadda jħakkek ma’ sieq il-lasta. Kwarta wara azzjoni bejn żewġ plejers li daħlu fit-tieni taqsima għal Valletta fejn Jake Azzopardi ta ballun lil Adrian Santiago Ferraris li x-xutt tiegħu għadda kemm kemm barra.
Referee: Fyodor Zammit
BOV Plejer tal-Logħba: Nevin Portelli (Marsaxlokk FC)
