Minn rapport ta’ investigazzjoni tal-Konsorzju Internazzjonali ta’ Ġurnalisti Investigattivi ħareġ li l-eks Ministru Nazzjonalista u Kummissarju Ewropew maħtur mill-Gvern ta’ Gonzi, John Dalli, kellu kumpanija fil-British Virgin Islands fi żmien meta kien deputat Nazzjonalista u li kien naqas jiddikjara li għandu fid-dikjarazzjoni tal-assi.
Skont dan ir-rapport, il-prova li Dalli għandu din il-kumpanija ġejja minn dokument li ħareġ fil-beraħ f’dawk imsejħa bħala l-Pandora Papers.
Fil-Pandora Papers ħarġu kważi qrib it-tnax-il miljun dokument li jitfgħu dawl fuq sidien ta’ kumpaniji sigrieta fosthom il-President Russu Vladimir Putin u l-Prim Ministru tar-Repubblika Ċeka Andrej Babiš, li fi tmiem il-ġimgħa li ġej se jaffaċċja elezzjoni.
Skont il-Pandora Papers, John Dalli uża s-servizzi ta’ Alcogal, kumpanija fil-Panama biex jaħbi li hu kellu kumpanija fil-British Virgin Islands bl-isem ta’ Westmead.
Din il-kumpanija fetaħha f’Awwissu tal-2006.
B’reazzjoni għal dan ir-rapport, Dalli saħaq li l-kumpanija Westmead kienet waħda inattiva u kien ħadha f’idejh minħabba li kellu xi xogħol barra minn Malta.
Iż-żewġ uliedu Claire Gauci Borda u Louisa Dalli kienu ħadu f’idejhom il-kumpanija aktar tard.
Dalli saħaq ukoll li fiż-żmien li hu kien Kummissarju Ewropew, huwa ried jiddikjara biss l-assi u l-interessi finanzjarji li setgħu ħolqulu kunflitt ta’ interess f’xogħlu.
Skont l-investigazzjoni rappurtata fuq it-Times, il-kumpanija Maltija Finco għenet lil John Dalli biex jiftaħ il-kumpanija Westmead fil-British Virgin Islands.
Finco, li diretturi fuqha hemm fost oħrajn Paul Bonello u Arthur Galea Salamone, qalet li hija sempliċiment introduċiet lil John Dalli bħala klijent, lill-kumpanija Alcogal fil-Panama biex Dalli fetaħ kumpanija fil-British Virgin Islands.
Intant l-eks Ministru Nazzjonalista mistenni jaffaċċja akkużi fil-Qorti Maltija b’rabta ma’ każ li kien wassal għar-riżenja tiegħu minn Kummissarju Ewropew.
Dalli kien irriżenja wara li allegatament, kollaboratur tiegħu kien involut f’attentat ta’ tixħim ta’ sittin miljun ewro biex tinbidel liġi Ewropea dwar l-isnus, forma ta’ tabbakk li ma jitpejjipx.
