F’pajjiżna naqas b’mod sostanzjali l-użu tad-droga eroina, li hija kkunsidrata bħala sustanza perikoluża.
Dan tħabbar propju f’konferenza tal-aħbarijiet, fejn fiha ġie ppreżentat r-rapport tas-Sitwazzjoni tad-Droga u r-Rispons Għaliha f’Malta għas-sena 2020 u l-bidu tal-2021.
Ir-rapport, li nħadem mill-Punt Fokali Nazzjonali għad-Droga u d-Dipendenza fuq id-Droga, juri kif dawk li jabbużaw bl-eroina u li mbagħad ifittxu trattament, naqqsu minn 71% fl-2015 għal 55% fl-2020.
Ħareġ ukoll kif dan ikompli jiġi appoġġjat mit-tnaqqis fit-teħid ta’ siringi b’xejn kif provduti mill-polikliniki li jinstabu madwar il-gżira kollha.
Wieħed mill-awturi tar-rapport Manuel Gellel spjega kif fatt ieħor pożittiv li ħareġ, huwa li aktar nies qed ifittxu l-għajnuna.
“Is-servizzi baqgħu effettivi u adattaw b’mod tajjeb fi żmien ta’ pandemija, in-numru ta’ persuni li kienu qed imorru għas-servizz baqgħu kostanti, jew żdiedu ftit, u xi ħaġa interessanti huwa l-ammont ta’ persuni li marru għas-servizz l-ewwel darba dawn irduppjaw.”
Manuel Gellel, awtur tar-rapport
Fl-2020, l-għadd ta’ persuni li bdew is-servizzi tat-trattament għad-droga għall-ewwel darba laħaq numru rekord ta’ 497 individwu, żieda għolja meta mqabbla mas-snin ta’ qabel.
Ta’ min jinnota wkoll li f’dawn l-aħħar ħames snin, kien hemm total ta’ 1,762 individwu li fittxew it-trattament għall-ewwel darba.
Barra minn hekk, fl-2020, l-aktar grupp ta’ età komuni li rċieva t-trattament kien il-grupp ta’ individwi bejn il-35 u d-39 sena, u dak ta’ bejn l-40 u l-44 sena bi 399 u 362 individwu rispettivament.
Il-kokaina hija t-tieni l-aktar droga primarja komuni fost dawk kollha li qed jirċievu t-trattament f’Malta.
Ġie spjegat kif il-qbid tal-kokaina ammonta għal 524kg, tnaqqis mill-747 kg li nqabad fl-2019.
L-għadd ta’ reati kontra l-liġi dwar id-droga għas-sena 2020 ammonta għal total ta’ 283, b’166 reat għall-pussess u 117 għat-traffikar.
Minn meta t-tribunal beda jipproċessa każijiet fl-2015 sa Diċembru 2020, il-maġġoranza tal-każijiet ipproċessati, li kienu jammontaw għal 1,277 każ, kienu fuq pussess tal-kannabis.
Każijiet li dehru quddiem it-tribunal għall-pussess tal-kokaina ammontaw għal 616 każ, filwaqt li 236 każ kienu għall-pussess tal-ecstasy.
Intqal ukoll kif fl-2020 kien hemm żewġ każijiet irrappurtati ta’ mwiet bid-droga.
Kien hemm ukoll numru ta’ nies li spiċċaw bla saqaf fuq rashom minħabba l-problema tad-droga u li fittxew kenn għand Dar Papa Franġisku, l-OASI u Dar Maria Dolores.
Il-purità medja fuq il-livell tat-triq fl-2020 kienet ta’ 21% għall-eroina, 28% għall-kokaina, 12% għar-raża tal-kannabis u 20% għall-ħaxixa tal-kannabis.
B’rabta ma’ dan ir-rapport, il-Ministru għall-Ġustizzja Soċjali Michael Falzon spjega kif id-droga qatt m’għandha tkun is-soluzzjoni.
“Huwa fatt li qed naraw aktar nies qed jersqu ’l quddiem, hija xi ħaġa nkoraġanti iva, imma irridu naħdmu aktar fejn fost l-oħrajn huwa importanti li nuru d-droga mhix soluzzjoni imma hija problema u aktar minn kollox li dawn in-nies nistmawhom bħal kull ċittadin ieħor u naraw li dawn ma jiġux ġġudikati.”
Il-Ministru Michael Falzon
