Ħidma konġunta bejn l-Awtorità tal-Mediċini flimkien mal-Awtorità għall-Kompetizzjoni u d-Drittijiet tal-Konsumatur waslet biex bi qbil mal-industrija seta’ jseħħ roħs sostanzjali f’54 mediċini importanti fis-suq f’pajjiżna.
Sostna dan il-Professur Anthony Serracino Inglott, f’kummenti ma’ ONE News b’reazzjoni għal-din it-tħabbira importanti li se twassal aktar flus fil-bwiet tan-nies.
Fil-fatt, il-Professur Serracino Inglott, innota ma’ dan l-istazzjon kif l-Awtorità tal-Mediċini taqdi numru ta’ funzjonijiet fosthom li tassigura l-aċċessibilità tal-mediċini għal min jeħtieġhom.
Hawnhekk iddistingwa żewġ fatturi fejn jidħol dan, li l-mediċini jkunu disponibbli fis-suq u li l-mediċini jkunu mibjugħa bi prezz li huwa aċċessibbli għal min jeħtieġhom.
“Il-Gvern ukoll qiegħed jaħseb ħafna li din għandna nagħtuha ċertu importanza. Illi kemm jista’ jkun inżommu l-mediċini fl-orħos prezz possibbli. Dan qed nagħmluh billi din id-darba naqqasna bil-koperazzjoni tal-industrija u bi qbil mal-industrija, naqqasna numru ta’ mediċini fil-prezz tagħhom xi kultant b’mod sinifikanti imma kull roħs jgħin.”
Prof. Anthony Serracino Inglott – Chairperson tal-Awtorità tal-Mediċini
Il-Professur innota wkoll li dan ir-roħs sar fi sfond ta’ numru kbir ta’ pajjiżi b’mod partikolari fl-Ewropa li qegħdin ikunu suġġetti għal rati ta’ inflazzjoni għolja anke f’dan is-settur.
Serracino Inglott b’hekk irrimarka li f’dan l-ambjent, kien aktar diffiċli li wieħed jkun jista’ jasal għall-qbil fuq dan ir-roħs.
Fil-fatt, b’kollox kienu total ta’ erbgħa u ħamsin mediċina li jistgħu jinxtraw mill-ispiżeriji f’Malta u Għawdex li traħħas il-prezz tagħhom bi proporzjoni differenti.
Fost oħrajn, b’mod notevoli l-Glucophage Unidie li tingħata lildawk li għandhom id-dijabete traħħsu b’erbgħa u ħamsin fil-mija għal ħdax-il ewro u ħamsin ċenteżmu.
Il-mediċina Neurostil traħħset għal disgħa u għoxrin ewro u ħamsin ċenteżmu, ekwivalenti għal wieħed u erbgħin fil-mija tal-prezz preċedenti.
It-tielet l-akbar traħħis kien fil-mediċina Seroquel li tingħata f’każijiet ta’ anzjetà u dipressjoni għal ftit anqas minn erbgħin ewro wara li kienet tinbigħ għal kważi sittin ewro.
Fil-każ tal-mediċina Tafamidis, li tintuża f’pazjenti b’mard rari ta’ newropatija, sar roħs li jammonta għal €1,900.
Aktar mediċini li traħħsu huma dawk immirati għal każijiet ta’ epilissija, il-fibromylagia u pressjoni għolja tad-demm, fost l-oħrajn.
Apparti r-roħs fil-prezz ta’ dawn il-mediċini, għaxar mediċini ġodda tat-tip ġeneriċi ddaħħlu f’Malta bi prezzijiet vantaġġużi.
Dan l-istazzjon tkellem ukoll mal-Ministru għall-Anzjanità Attiva, Jo Etienne Abela li hu politikament responsabbli mill-Awtorità tal-Mediċini, li nnota kif dan it-traħħis wasal wara impenn mill-Gvern, bl-insistenza tal-Prim Ministru Robert Abela u l-privat.
“Malta u Għawdex avolja pajjiż ċkejken u m’għandna l-ebda say kemm sippost jiswew il-mediċini, bil-buon sens, bir-rieda tajba bejn il-Gvern u il-privat qed jirnexxilna nakkwistaw dan għaċ-ċittadini tagħna.”
Jo Etienne Abela – Ministru
