Raġel ta’ 46 sena l-isptar wara ħabta fil-Mosta

Raġel ta’ 46 sena residenti l-Mellieħa, għall-ħabta tad-disgħa u nofs ta’ dalgħodu, ittieħed l-Isptar Mater Dei wara li weġġa’ f’inċident tat-traffiku fi Triq San Pawl tal-Qliegħa, Mosta.

Mill-ewwel stħarriġ irriżulta li kienet seħħet ħabta bejn vettura misjuq minn raġel ta’ 43 sena residenti l-Imġarr, u mutur Piaggio misjuq mill-vittma.

Ix-xufier tal-mutur ingħata l-għajnuna minn tim mediku u ttieħed l-isptar b’ambulanza għal kura meħtieġa.

Aktar tard, huwa ġie ċċertifikat li weġġa’ gravi.

L-investigazzjonijiet tal-Pulizija għadhom għaddejjin.