Raġel ta’ ħamsa u ħamsin sena minn San Ġwann baqa’ jinżamm arrestat wara li tressaq il-Qorti mixli bi traffikar ta’ droga kokaina u pussess ta’ raża tal-kannabis kif ukoll ħasil ta’ flus.
Miegħu tressqet ukoll tfajla ta’ ħamsa u għoxrin sena, li ngħatat l-libertà proviżorja.
Il-Qorti semgħet kif il-Pulizija arrestathom b’rabta ma’ sejba ta’ aktar minn erba’ kilogrammi droga suspettata kokaina u kannabis.
Il-Pulizija arrestat lir-raġel li kien dieħel f’appartament f’Buġibba u fil-fatt fil-pussess tiegħu kellu kaxxa li fiha kien hemm madwar kilo droga suspettata kokaina b’valur fit-triq li jaqbeż il-mija u tletin elf ewro.
Minn hemm tfittxija oħra wasslet għas-sejba ta’ madwar tliet kilogrammi suspettati raża tal-kannabis b’valur fis-suq ta’ madwar sittin elf ewro.
Aktar tard saret ukoll tfittxija fir-residenza tar-raġel f’San Ġwann, bil-Pulizija ssib madwar tliet mitt gramma oħra droga suspettata ħaxixa tal-kannabis.
Quddiem il-Maġistrat Josette Demicoli, iż-żewġ akkużati ċaħdu l-akkużi.
