Taljan ta’ 37 sena qed isofri minn ġrieħi gravi wara li waqa’ mill-mutur f’Għawdex.
Il-każ seħħ ilbieraħ, għall-ħabta tas-6 ta’ filgħaxija fi Triq il-Kunċizzjoni, l-Qala, Għawdex.
Minn stħarriġ li sar irriżulta li raġel Taljan ta’ 37 sena li joqgħod in-Nadur, Għawdex, kien qiegħed isuq mutur tal-għamla Keeway Cityblade meta għal xi raġuni tilef il-kontroll tal-mutur u waqa’.
Ambulanza fuq il-post ħadet lis-sewwieq tal-mutur l-Isptar Ġenerali t’Għawdex għall-kura fejn iktar tard, ġie ċċertifikat li qiegħed isofri minn ġrieħi gravi.
L-investigazzjoni tal-Pulizija dwar dan l-inċident għadha għaddejja.
