Inspire Malta ħarġet avviż bl-għan li twaqqaf raġel milli jkompli jisraq bottijiet tal-ġbir li jinsabu f’numru ta’ ħwienet madwar Malta u Għawdex.
L-Inspire Malta spjegat li r-raġel qed jidħol fil-ħwienet u jgħid lis-sidien li se jkun qed jiġbor il-bott għal ftit ħin biex jagħmilu ċippa ta’ sigurtá u ma jirritorna qatt lura.
Ġie spjegat, li dawn it-tip ta’ rapporti saru minn madwar Malta kollha u mhux minn lokalitá waħda. L-Inspire spjegat lis-sidien tal-ħwienet li għandhom dawn il-bottijiet ta’ ġbir, li membru ta’ Inspire jkollhu karta ta’ identifikazzjoni. Filwaqt li meta jinġabar il-bott, is-sid tal-ħanut jintalab jiffirma karta biex jikkonferma dan.
L-Inspire kellha appell għal dawk is-sidien ta’ ħwienet li jgħaddu mill-istess esperjenza, biex iċemplu fuq 20928100 u jirrapportaw.
