Raġel ta’ 36 sena minn Ħal Qormi ġie arrestat u se jitressaq il-Qorti llum għall-ħabta tal-ħdax u kwart fuq akkużi ta’ droga.
Ir-raġel ġie arrestat ilbieraħ minn uffiċjali tas-sezzjoni tar-Rapid Intervention Unit waqt spezzjonijiet tat-traffiku matul il-lejl li għadda fi Triq l-Imdina f’Ħal Qormi, meta nstab fil-pussess t’ammont ta’ droga.
Għall-ħabta tal-ħdax neqsin kwart ta’ filgħaxija, il-Pulizija nnutaw karozza tieqaf ftit ’il bogħod minnhom u x-xufier aġixxa b’mod suspettuż.
Kif raw dan, l-uffiċjali avviċinaw l-imsemmija karozza u wara tfittxija fiha u fuq ir-raġel, sabu diversi pakketti suspettati kokaina, flus kontanti u oġġetti oħra relatati mad-droga.
Ir-raġel se jitressaq il-Qorti llum quddiem il-Maġistrat tal-Għassa Dr Ian Farrugia mill-Pulizija tad-Distrett u mill-Iskwadra ta’ Kontra d-Droga.
