FL-Al Janoub Stadium, Franza ħadu t-tliet punti li ma ħadux it-timijiet l-oħra fi Grupp D, meta għelbu lill-Awstralja bl-iskor ta’ 4-1. Dan wara li ż-żewġ logħbiet l-oħra f’dan l-istess grupp, spiċċaw fi draw ta’ mingħajr gowls.
Kienu l-Awstraljani li marru kmieni fil-vantaġġ, meta wara biss disa’ minuti kross fil-baxx lejn it-tieni lasta sab lil Craig Goodwin lest biex spara fir-rokna tax-xibka. Dan kien l-aktar gowl veloċi għat-tim nazzjonali Awstraljan u l-ewwel darba li skorjaw fl-ewwel għaxar minuti fit-Tazza tad-Dinja,
Fit-13-il minuta, bidla kmieni mhux mistennija għall-Franċiżi, meta Lucas Fernandez weġġa’ irkopptu fl-azzjoni tal-gowl u kellu jċedi postu għal ħuh Theo Fernandez.
Fis-27 minuta, wasal il-gowl tad-dro għal Franza, minn azzjoni ta’ korner, l-Awstraljani ddefendew kif setgħu, Hernandez ħa l-ballun mill-ġdid u tefgħu lejn Adrien Rabiot li bir-ras ma falliex.
Fit-32 minuta, il-Franċiżi marru fil-vantaġġ bi ġmiel ta’ gowl ta’ Olivier Giroud li bl-għajnuna ta’ Rabiot tefa’ f’lasta vojta.
Fit-tieni taqsima, waslu aktar gowls mit-tim nazzjonali Franċiż. Fit-68 minuta kien imiss lil Kylian Mbappe li rċieva mingħand Dembele u skorja t-tielet gowl. Mbappe sar l-iżgħar plejer li skorja ħames gowls għal Franza, fit-Tazza tad-Dinja.
Fil-71 minuta, reġa’ kien Giroud li rċieva l-ballun minn kross ta’ Mbappe u b’daqqa ta’ ras għamilhom 4-1. B’hekk Giroud ta’ 36 sena, laħaq lil Thierry Henry u sar it-top scorer mat-tim nazzjonali.
Għada fil-ħdax ta’ filgħodu, minn Grupp F ikollna l-Marokk kontra l-Kroazja. Fis-sagħtejn ta’ waranofsinhar, minn Grupp E, jilagħbu l-Ġappun u l-Ġermanja u fil-ħamsa mill-istess grupp Spanja kontra l-Kosta Rika. Fit-tmienja ta’ filgħaxija, minn Grupp F, ikollna l-Belġju kontra l-Kanada.
Ritratt: AFP
