Fl-isfond tal-bnadar mezz’asta madwar il-pajjiż u f’jum ta’ luttu, għadha kemm ġiet fi tmiemha quddiesa mtella’ għall-memorja u b’sufraġju għal ruħ Papa Franġisku – Papa tant maħbub li ħalla din id-dinja l-għada ta’ Ħadd il-Għid fl-għomor ta’ 88 sena.
Fl-omelija, l-Arċisqof Charles J. Scicluna tkellem dwar il-konverzjoni profonda li kellu Papa Franġisku fi Buenos Aires, fl-Arġentina – fejn qal li kien u baqa’ Appostlu tal-Ħniena t’Alla. Dan deher biċ-ċar hekk kif huwa fl-2016 kien ħabbar il-Ġublew tal-Ħniena. Huwa dejjem ried li l-Kelma t’Alla twassal ferħ.
Tkellem dwar kif dejjem xtaq li l-messaġġ tiegħu ikun ta’ tama u li jlaqqa’ n-nies mal-missieru u mal-ferħ li jġib l-Evanġelju.
L-Arċisqof stqarr kif il-Papa ħabb lil kulħadd – xhieda ta’ dan f’kull min iltaqa’ miegħu, kif ukoll il-ħarsa tiegħu u anke l-ħerqa li jżur fost dawk l-aktar batuti fostna. Hawn iddeskrivih bħala ragħaj li jħobb lill-poplu tiegħu. Hawn aċċenna wkoll għaż-żjara tiegħu f’pajjiżna fejn kien qal li pajjiżna hija strument ta’ paċi fejn anke faħħar lil Malta li kienet strument ta’ Evanġelizzazzjoni.
Semma wkoll il-Ġublew tat-Tama miftuħ minn Papa Franġisku u li se jiġi konkluż mis-Suċċessur tiegħu.
Preżenti għal din il-Quddiesa ċċelebrata mill-Arċisqof Scicluna kien hawn għadd ta’ mistiedna distinti, fosthom il-President tar-Repubblika Myriam Spiteri Debono, kif ukoll il-Prim Ministru Robert Abela. Preżenti wkoll kien hemm il-Prim Imħallef Mark Chetcuti u l-Ambaxxatur għas-Santa Sede Frank Zammit u rappreżentanti minn reliġjonijiet differenti.
Filfatt, preżenti wkoll għal din it-tislima kien hawn għadd ta’ membri tall-Kleru fosthom in-Nunzju Appostoliku, sorijiet u sacerdoti. Dan filwaqt li dawn kienu akkumpanjati mill-abbatini kif ukoll membri minn ordinijiet differenti.
