Gvern Laburista huwa dak li jagħti garanzija lill-familji u n-negozji waqt mumenti ta’ sfidi internazzjonali.
Dan kien il-messaġġ ewlieni li għadda l-Prim Ministru u Mexxej Laburista waqt il-programm XTRA fuq ix-xandir nazzjonali.
Il-Prim Ministru saħaq kif waqt kriżi internazzjonali, dik fl-Ukrajna, il-Gvern qed imexxi bl-istess politika li mexxa waqt pandemija.
“Hija garanzija ta’ stabbiltà li hija meħtieġa għaliex jekk ma tofriex dik l-istabbiltà ir-riperkussjonijiet ekonomiċi ma jkunux sbieħ u dik il-garanzija ilna nagħtuha sa minn Marzu tal-2020 għaliex tajjeb ngħidu li mhux l-ewwel darba li l-prezz taż-żejt tela’ ’il fuq bil-mod li rajna jiġri f’dawn l-aħħar ġimgħat. Qisu għandna replika ta’ dak li ġara f’Marzu tal-2020 kemm fuq l-enerġija, partikolament ukoll fuq il-provvista ta’ basic food stuff, jiġifieri llum il-mod kif qed nerġgħu naħdmu huwa bl-istess mod ekonomiku li użajna f’Marzu tal-2020 li ma mmorrux għall-awsterità kif għamlu ta’ qabilna imma mmorru billi ninċentivaw lin-negozji u lin-nies.”
il-Prim Ministru Robert Abela
Il-Prim Ministru rrimarka kif f’sentejn ta’ sfida, dik tal-pandemija, il-Gvern kien ta’ spalla għan-negozji, il-ħaddiema u l-familji Maltin u Għawdxin.
Hawnhekk Dr Abela saħaq kif il-Gvern għandu prinċipju wieħed dak ta’ ġustizzja soċjali, waqt li jgħin u jinċentiva l-aktar dawk li jifilħu l-anqas fis-soċjetà.
“Marzu 2020 kien il-mument li nagħtu l-wage supplement. Minn dakinhar sa llum b’mod konsistenti bqajna nħallsu l-wage supplement u llum ħriġna nort of €700 miljun f’Wage Supplement waħdu. Meta f’Ġunju kien wasal f’waqtu l-Pjan ta’ Riġenerazzjoni Ekonomika qassamna skema ta’ vawċers €100 lil kull persuna li umbagħad xhur wara erġajna ħriġna t-tieni skema u li bejn dawk iż-żewġ skemi investejna mal-€100 miljun. L-aqwa investiment li stajna nagħmlu fin-nies. F’Ġunju tal-2020 kien il-mument li nraħħsu l-prezz tal-fjuwils minkejja li konnha f’pandemija, kien il-mument li nagħtu sussidju fuq il-kont tal-elettriku tal-businesses.”
il-Prim Ministru Robert Abela
Waqt din l-intervista mal-ġurnalist ta’ esperjenza Saviour Balzan, il-Prim Ministru Robert Abela qal kif minkejja li din il-ġimgħa pajjiżna se jmur jivvota, huwa se jħalli Malta ftit tas-sigħat u se jkun qed imur għal Summit tal-Kunsill Ewropew fi Brussell.
Hawnhekk Dr Abela saħaq fuq l-interess nazzjonali, kif diġà għamel darbtejn matul din il-kampanja elettorali fejn qeda l-impenji tiegħu bħala Kap tal-Gvern Malti fil-fora Ewropea.
“Fl-aħħar ta’ din il-ġimgħa minkejja li fuq l-għatba ta’ elezzjoni ġenerali se nerġa’ mmur Brussell għaliex nemmen lill-prijorità tiegħi anke f’din il-ġimgħa tibqa lejn il-pajjiż. Se nerġgħa nibgħat dan il-messaġġ li iva ejja nagħmlu fuq livell ewropew dak kollhu possibli biex infittxu l-paċi u jieqfu dawn it-tensjonijiet u jridu jieqfu dawn l-attakki nsensati. Huma attakki nsensati mhux provokati u qed jagħmlu kif għidt tajjeb int ħsara enormi.”
il-Prim Ministru Robert Abela
Waqt dan il-programm fil-ħames ġimgħa u l-aħħar ġimgħa tal-kampanja elettorali, il-Prim Ministru saħaq kif l-elezzjoni ta’ nhar is-Sibt li ġej tibda minn xejn b’xejn u qal kif il-Partit Laburista jista’ jassigura li jindirizza l-isfidi tan-nies.
Il-Prim Ministru kellu messaġġ importanti waqt dan il-programm.
“Il-messaġġ tiegħu hu ħarsu lejn kif imxejna waqt il-pandemija, konna dejjem gvern viċin in-nies, tgħajna s-sostenn kollhu li stajna, perfetti ma konniex żbalji għamilna żbalji li għamilt jien l-ewwel wieħed. Li nista’ nassigura l-impenn li nkomplu ntejbu fejn għamilna tajjeb, fejn stajna għamilna aħjar determinati li nibqgħu nagħmlu t-tajjeb. Pero’ l-għażla ta’ nhar is-Sibt ma hemm xejn li hu determinat jew ċert dwar ir-riżultat tagħha. Issa huma n-nies li jridu jgħatu l-ġudizzju tagħhom dwar it-tfal tagħhom u l-pajjiż.”
il-Prim Ministru Robert Abela
