B’daqqa tal-ballun miċ-ċkejken Kane Debattista li qassam lill-President ta’ Malta George Vella, bdiet il-marataona ta’ sittin siegħa ta’ futbol u volleyball b’risq Puttinu Cares fil-kumpless sportiv tal-Marsa.
Wara jiem b’temp iswed u xita, il-maratona bdiet f’atmosfera sabiħa fil-preżenza ta’ bosta tfal minn għaqdiet, skejjel u timijiet differenti. F’isem il-poplu Malti, il-President Vella ta ħajr lil kull min jagħti s-sehem tiegħu biex tirnexxi l-maratona ta’ Puttinu u qal li kull kontribuzzjoni li tingħata tissarraf f’konfort għall-qraba tal-morda u hija ġest ta’ mħabba.
Kif qalilna Ryan Debattista, missier iċ-ċkejken Kane li għal dawn l-aħħar xhur ingħatat trattament għall-kura tal-kanċer fl-Ingilterra, Puttinu kien ta’ spalla kbira għal familja tiegħu meta tahom appartament fejn jgħixu meta binhom intlaqat minn din il-marda.
“Meta mardilna t-tifel aħna allaħares ma kinux dawn in-nies, allaħares ma kienx puttinu. Għidli x’kelli nagħmel jiena kelli nitla ‘bil-familja, qatt ma sifirt jien la holiday u kelli nsiefer ħabba t-treatment tat-tifel. X’kont ħa nagħmel jien bil-familja.” Stqarr Ryan, missier Kane.
Il-Viċi President ta’ Puttinu Cares Angele Cuschieri qalet li l-ħamsa u għoxrin appartament li l-fondazzjoni għandha fiċ-Ċentru ta’ Sutton mhumiex biżżejjed għall-pazjenti kollha li jitilgħu għall-kura l-Ingilterra.
“L-għan ta’ din il-maratona huwa sabiex inkomplu niġbru fondi sabiex nibnu dan il-blokk bini appartamenti fiċ-ċentru ta’ Londra. Sfortunatament ir-rata kull sena qed tizdied u bħalissa bejn sittin u disgħin pazjent qed jitilgħu l-Ingilterra kull xahar.” Saħqet Angele Cuschieri.
Il-maratona se tibqa’ għaddejja sal-Ħadd u tinkludi attivitajiet għall-familja kollha kif ukoll bejgħ ta’ bosta oġġetti u rkant ta’ affarijiet iffirmati mil-leġġenda tal-futbol Roberto Carlos.
