Fil-jiem li ġejjin, mal-erbat elef u sitt mitt student Universitarju li temmew l-istudji tagħhom b’suċċess is-sena l-oħra imma ma ggradwawx f’ċerimonja uffiċjali minħabba l-pandemija, se jkunu qed jilbsu t-toga u jieħdu ċ-ċertifikat biex jiċċelebraw u jaqtgħu l-frott ta’ snin ta’ studji u sagrifiċċji.
Fl-ewwel mis-sitta u għoxrin ċerimonja li se jsiru tul dan ix-xahar għall-istudenti li lestew l-istudji tagħhom is-sena l-oħra, iggradwaw studenti mill-Fakultà tax-Xjenzi tas-Saħħa, fosthom infermiera u nies li jaħdmu fil-qasam tas-saħħa mentali.
F’indirizz lill-gradwati, ingħad li tinstema’ stramba l-frażi li fl-elfejn u wieħed u għoxrin qed jiggradwaw studenti tal-elfejn u għoxrin, imma daqstant ieħor huma strambi ż-żminijiet li qed ngħixu fihom.
Madanakollu, l-istudenti ġew imfaħħra għar-reżiljenza li wrew biex minkejja l-isfidi bla preċedent, komplew jistudjaw u llum setgħu jiċċelebraw il-kisbiet tagħhom.
Iltqajna ma’ Ylenia Spagnol u Rebecca Micallef, li sena ilu lestew il-kors ta’ infermiera.
Spagnol qalilna, “Better late than never. Kienet naqra let-down last year li wara tliet snin ta’ studju, tkun trid tiċċelebra, imma kif għidt, waslet fl-aħħar anki tilbes it-toga, tgħid studjajt u wasalt.”
Micallef stqarret: “Ninsab vera eċitata għax wara pandemija bħal dik qatt ma ħsibt li din il-ġurnata se tasal. Kienet dejjem ħolma tiegħi li niggradwa allura li fl-aħħar qiegħda hawn, vera ninsab kuntenta.”
Ylenia u Rebecca huma fost l-istudenti li mingħajr ma ggradwaw b’mod uffiċjali, rifsu mill-ewwel fuq l-għatba tal-karriera tagħhom u qamu għall-okkażjoni biex jipprattikaw dak li studjaw.
Spagnol sostniet: “Qatt ma mmaġinajt li se nibda l-karriera f’pandemija, it was very challenging imma issa looking forward biex nitgħallem iktar. Tgħallimt ħafna din is-sena, għadni fil-bidu jiġifieri jonqosni ħafna x’nitgħallem imma tant hu xogħol ta’ dedikazzjoni u vokazzjoni li I wouldn’t have chosen another career, for sure.”
Il-professjoni ta’ dawn iż-żewġ żgħażagħ kienet meqjusa fost l-aktar importanti biex ġew salvati l-ħajjiet f’pandemija.
Micallef tenniet: “Bħala karriera qatt ma ħsibt li se nibda f’pandemija imma l-fatt li bdejna f’pandemija tgħallmek ħafna għax kull pazjent, bil-Covid u mhux bil-Covid, trid tittrattah daqslikieku m’għandu xejn u huwa xogħol li jagħtik ħafna sodisfazzjon.”
Dawn iċ-ċerimonji qed isegwu l-protokolli tal-awtoritajiet tas-saħħa, fosthom bl-ilbies tal-maskri, iż-żamma tal-ispazju bejn student u ieħor, u anki l-mod kif qed jitqassmu ċ-ċertifikati.
