L-Erbgħa kompliet tinstema l-kumpilazzjoni tax-xhieda fil-każ ta’ Rica Mifsud Grech, Jurgen Falzon u Luca Brincat, 3 Kuntistabbli tal-Pulizija li bħalissa jinsabu sospiżi wara li tressqu l-Qorti akkużati bi vjolenza eċċessiva u bi-ħtif ta’ persuni barranin, fost affarijiet oħra.
Quddiem il-Maġistrat Joe Mifsud, xehed l-Ispettur Omar Zammit fejn ta’ rendikont tal-investigazzjoni fil-konfront tat-tliet imputati.
L-Ispettur Zammit spjega li nhar il-Ġimgħa 7 ta’ Ottubru, il-Kuntistabbli Abigail Sciberras xtaqet tirrapporta reati li allegatament twettqu mill-kollegi tagħha stazzjonati fl-għassa tal-Ħamrun magħha.
Hija sostniet kif fuq dawn ir reati kienet fethet qalbha ma’ żewġ kollegi minn tagħha, Lydon Azzopardi u Ryan Mercieca u li dawn ukoll xtaqu jagħmlu rapporti simili.
L-Ispettur Omar Zammit spjega kif ġiet mitluba investigazzjoni minnufih mill-Kummissarju tal-Pulizija.
Fix-xhieda tiegħu Lydon Azzopardi spjega li fil-lejl ta’ bejn il-1 u 2 ta’ Settembru kien night duty u patrol ma’ Jurgen Falzon u Luca Brincat. Huwa kompla jispjega li waqt il-patrol fil-Marsa, innutaw lill-immigrant Abdul Hamid Sayed li beda jagħmel l-istorbju għax kien taħt l-effett tax-xorb.
Azzopardi spjega li huma niżlu mil-karozza u Luca u Jurgen qabdu lil din il-persuna min idu u tefgħuh mas-saqaf tal-karozza u għamlulu tfittxija. Hemmek ma sabulux affarijiet illegali.
L-Ispettur Omar Zammit kompla jgħid kif Lydon Azzopardi quddiem il-Maġistrat kompla jgħid li Hamid Sayed ġie mmanettjat u tpoġġa fil-karozza tas-servizz tal-għamla Peugot.
Azzopardi sostna li hemm Jurgen qallu biex jigbed lejn Ħal Qormi mingħajr ma tah spjegazzjoni. Kif daħlu fil-wied ta’ Ħal Qormi Lydon Azzopardi spjega li hu ħaseb li kienu ser iħallu lil Hamid Sayed hemm u jitilqu. Madankollu Azzopardi qal li Luca qallu biex ineħħu l-body cam. Azzopardi qal li rrifjuta jagħmel dan madankollu spjega li Luca neħħijielu hu. Hawn Azzopardi kompla jispjega li lil Hamid Sayed, Falzon u Brincat qabdu jtuħ bis-sieq fil-kustilji u saħansitra waddbulu ġebla mdaqqsa.
Lydon Azzopardi spjega wkoll li sema’ lil din il-persuna tibki bl-uġih.
Wara li l-Pulizija telqu minn fuq il-post Lydon Azzopardi xehed li ma felaħx b’din il-ħaġa u ddeċieda li jerġa’ jmur fuq il-post madankollu meta wasal ma sabx lil vittma hemm.
L-Ispettur Omar Zammit spjega wkoll li l-Kuntistabbli Ryan Mercieca li xehed quddiem l-inkjesta maġisterjali, sostna li kien preżenti għal diversi istanzi fejn it-tliet imputati kienu jiġbru persuni reqdin barra li huma ta’ nazzjonalità barranija, u kienu jużaw taser jew pepper spray fuqhom.
Dwar ix-xhieda ta’ Abigail Sciberras intqal li f’lejl waqt li kienet duty, hija marret mal-imputati fuq patrol fi Triq is-Serkin il-Marsa. Hawn kien hemm grupp ta’ Maltin jistennewhom. Wieħed mill-Maltin qal lil Luca Brincat li kien hemm persuna barranija li kien qed itihom fastidju u biex b’hekk jeħilsu minnu.
Hawn Sciberras spjegat li Brincat qabad persuna barranija li fil-fatt, ma kienx dak indikat mill-Maltin. Meta fetħulu għajnejh dwar dan Sciberras sostniet li Luca qallhom iħallu f’idejh u kien hemm li arrestah.
Minn hemm ġie spjegat kif Luca daħħal lill-persuna fil-karozza tas-servizz u hemm Jurgen saq lejn il-Wied fil-limiti tal-Ħandaq f’Ħal Qormi fejn fi dlam ċappa mill-ġdid qalu lix xhud sabiex tnehhi l-body cam u qabdu jsawtu lil persuna.
Intant l-Ispettur Omar Zammit spjega kif Lydon Azzopardi wrihom filmat li xxerred fuq il-pjattaforma Messenger fi group chat. F’dan il-filmat jidher Luca Brincat b’mus f’idu bilqegħda quddiem mejda fl-għassa tal-Ħamrun u quddiemu persuna ta’ karnaġġjon skur.
F’dan il-filmat, ġie spjegat li Luca Brincat jinstema’ jgħidlu biex jagħmillu ‘promise’ li mhux se jerġa’ jiġġieled u li dakinhar il-Pulizija kienu tajbin miegħu u ‘next time trouble.’ Hawn kompla jiġi spjegat li Luca Brincat deher jiftah il-mus u bih f’idu jgħid lil vittma li jekk jerġa’ jarah il-Marsa, għamillu sinjal indikattiv ta’ meta wieħed iħanxar għonq xi ħadd.
L-Ispettur Omar Zammit kompla jispjega li l-Maġistrat Inkwerenti ordna li jinġabar dan il-filmat. Huwa pprovda wkoll lista ta’ affarijiet li nġabru mingħand l-imputati. Dawn jinkludu taser mill-locker ta’ Rica Mifsud Grech u pepper spray mill-karozza tagħha li ma kienux tal-Korp tal-Pulizija. Mingħand Luca Brincat inġabar taser torch u mus, filwaqt li fil-locker u l-karozza tiegħu ma nstab xejn.
Jurgen Falzon ġie arrestat fid-dar tiegħu u fi tfitttxijiet li saru fil-kamra tas-sodda tiegħu u l-karozza ma nstab xejn. Il-mowbajls tat-tliet imputati ġew mgħoddija lill-espert tal-Qorti.
L-Avukat ta’ Luca Brincat, Franco Debono assistit minn Dr Francesca Zarb staqsa lill-Ispettur Zammit dwar l-għodda li tingħata mill-Korp lill-Kuntistabbli għal waqt il-qadi ta’ dmirijiethom.
L-Ispettur Zammit wieġeb li l-Kuntistabbli jkollhom manetti u tasers.
Intant il-Pulizija bdiet tfittex il-vittmi ta’ dawn l-allegati każijiet. Wieħed minnhom jinsab fil-Faċilità Korrettiva ta’ Kordin. Dan filwaqt li spettur mar fuq il-post fejn seħħ wieħed mill-allegati każ ta’ swat fil-Wied ta’ Ħal Qormi magħruf aħjar bħala Tas-Slaleb. Espert tal-Qorti ġie ordnat ukoll jeleva filmati minn dar fil-viċinanzi.
L-Ispettur Omar Zammit spjega kif wieħed mill-vittmi mal-Pulizija spjega li kien fis-sakkra meta ddaħħal fil-karozza tal-Pulizija. Spjega li l-Pulizija tawh xeba bil-ponn u bis-sieq. Huwa ta’ deskrizzjoni ta’ wieħed mill-Pulizija hekk kif spjega li kien mibni u bid-daqna. Spjega li l-Pulizija l-ieħor kien iżgħar.
Sostna li l-uffiċjal Lydon Azzopardi ma tahx xeba.
Meta l-vittma kien mistoqsi għaliex ma għamilx rapport huwa sostna li ma setax imur jirraporta fil-post fejn jaħdmu l-allegati persuni li sawtuh.
Vittma ieħor ta’ dawn l-allegati każijiet ġie ntraċċat u mal-pulizija spjega kif ittieħed Ħal Qormi minn tliet uffiċjali tal-Pulizija. Huwa spjega li abbandunawh hemm wara li tawh daqqiet ta’ ponn u sieq. Huwa spjega kif wara l-allegat każ, mexa għal triq arterjali u prova jagħmel sinjali lil karozzi biex jieqfu madankollu dan irriżulta fin-negattiv.
L-Ispettur Omar Zammit spjega li l-investigazzjoni ma sabet l-ebda rapport fis-sistema tal-Pulizija dakinhar.
L-Avukat tad-Difiża Veronique Dalli, assistita minn Dr Dean Hili, f’isem Rica Mifsud Grech, staqsiet jekk l-aħħar vittma kienx qed jiġi investigat b’rabta ma’ ħsara f’ħanut u jekk is-sid tal-ħanut.
L-ispettur Zammit sostna li kull ma jaf huwa li l-vittma ħie trattat l-isptar.
Dr Dalli saqsiet ukoll jekk wieħed mill-allegati vittmi kienx l-Isptar Monte Carmeli. L-Ispettur Zammit ikkonferma.
L-Avukat tad-Difiża Edmond Cuschieri f’isem Jurgen Falzon staqsa wkoll jekk ġewx iċċertifikati l-ġrieħi tal-vittmi. L-Ispettur Omar Zammit wieġeb fin-negattiv għaliex sostna li huma ma marrux għand l-awtoritajiet.
Fil-Qorti ġie nnutat ukoll li Rica Mifsud Grech ma kienetx involuta fil-każ li nvolva l-mus.
Fil-kumpilazzjoni tax-xhieda xehdet ukoll is-Supretendent Graziella Muscat mill-Professional Standards Unit.
Fost oħrajn sostniet ukoll li t-taqsima tagħha hija konxja bil-filmat imsemmi mill-Ispettur Zammit. Muscat provdiet ukoll dettalji ta’ kif u meta ġew arrestati l-imputati.
L-Avukat Edmond Cuschieri staqsa wkoll jekk din it-taqsima fil-Korp qatt irċevietx rapporti dwar is-surġenti tal-akkużati. Muscat wieġbet fin-negattiv. Intant, Dr Veronique Dalli staqsiet jekk l-istess taqsima qatt irċevietx rapporti mingħand Rica Mifsud Grech kontra s-surġent tagħha. Dan hekk kif Dr Dalli spjegat li l-klijenta tagħha kienet irrappurtat imġieba mhux etika minn ta’ fuqha inkluż imġieba sessista.
Is-Supretendent Graziella Muscat wieġbet li ma tafx bir-rapport iżda li tiftakar li li Rica għamlet rapport li tilfet xi ċwievet.
Xehdu wkoll l-Ispetturi Jeffrey Rizzo u l-Maġġur Eugenio Caruana dwar it-testimonjanzi tal-Pulizija li rrappurtaw lill-akkużati.
Is-seduta ġiet aġġornata għat-18 u l-20 ta’ Ottubru.
