Erba’ żgħażagħ ta’ bejn l-20 u t-23 sena, kienu arrestati fil-lejl ta’ bejn il-Ġimgħa u s-Sibt f’garaxx f’Ħ’Attard. Dan waqt rejd li għamlu Membri mill-Iskwadra ta’ Kontra d-Droga.
Minn tfittxijiet li saru, instabu madwar kilo u nofs raża tal-kannabis, aktar minn nofs kilo kokaina, madwar mitejn u ħamsin gramma pjanta tal-kannabis, armi tan-nar, flus kontanti u kif ukoll oġġetti relatati mad-droga.
Minn investigazzjonijiet li saru rriżulta li l-garaxx li fih sar ir-rejd, kien qed jintuża biex id-droga tiġi ppreparata f’boroż żgħar biex tinbiegħ. Iż-żgħażagħ qed jinżammu arrestati biex jassistu lill-Pulizija fl-investigazzjonijiet. Mhux eskluż li jitressqu l-Qorti fis-sigħat li ġejjin. L-investigazzjonijiet tal-Pulizija għadhom għaddejjin.
