Ftehim bejn il-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni u s-Soċjetà Maltija għall-Ħarsien u l-Kura tal-Annimali, l-MSPCA, wassal biex jitnieda l-programm ‘Acts of Kindness’, bħala parti mill-kurrikulu tal-Personal, Social and Career Development, il-PSCD, fl-iskejjel.
Il-programm jinkludi t-tqassim ta’ ktejjeb ġdid ta’ eżerċizzji b’attivitajiet li jwasslu messaġġi pożittivi u jkopru għarfien akbar dwar il-benesseri tal-annimali. Uffiċjali mill-MSPCA se jżuru l-iskejjel biex jispjegaw lill-istudenti l-importanza tal-ħarsien tal-annimali.
II-Ministru Clifton Grima saħaq li dan il-programm se joffri edukazzjoni ħolistika ħalli t-tfal jitilgħu bħala ċittadini responsabbli f’kull settur tal-ħajja.
Qal, “Is-sistema edukattiva ta’ pajjiżna trid tkun waħda li tagħti esperjenzi differenti lit-tfal tagħna. Allura hu importanti li jkollok dawn it-tip ta’ programmi li jgħinu lit-tfal fl-iżvilupp sħiħ. Qed naraw kif it-tfal fl-iskejjel kollha ħa jgawdu minn dan l-għarfien u t-tagħlim li jgħin lit-tfal isiru ċittadini maturi li jirrappreżentaw lil pajjiżna.”
Louiselle Grech mill-MSPCA spjegat li l-organizzazzjoni ilha impenjata fl-edukazzjoni dwar il-ħarsien tal-annimali fl-iskejjel bħala parti mit-tagħlim kurrikulari għal għexieren ta’ snin.
Qalet li dan il-programm ġdid jippromwovi l-empatija, imġieba aktar responsabbli u iżjed għarfien dwar il-ħarsien tal-annimali.
Qalet, “L-għan hu biex inħaddnu valuri ta’ ġentilezza, passjoni, empatija u responsabbiltà fit-tfal u ż-żgħażagħ tagħna.”
