Ġie varat programm biex il-kunsilli lokali jingħataw informazzjoni dwar kif għandhom japplikaw għall-European Label of Government Excellence, li huwa premju għall-governanza tajba.
Dan il-Premju jingħata wara li jittieħdu inkunsiderazzjoni tnax-il prinċipju ta’ governanza tajba li jirrelataw ma’ kif ikunu qegħdin jittieħdu d-deċiżjonijiet u ma’ kemm il-Kunsilli Lokali jsegwu l-liġijiet, fost oħrajn.
Il-prinċipji ewlenin għall-governanza tajba fir-rigward tal-kunsilli lokali jinkludu, fost l-oħrajn, ir-responsabbiltà, ir-rispons għall-ħtiġijiet tar-residenti, l-effiċjenza u l-effettività fit-twassil tas-servizzi, it-trasparenza, il-kompetenza, u l-innovazzjoni.
Il-Kunsill Lokali ta’ Pembroke kien l-ewwel kunsill li kiseb dan il-Premju ta’ rikonoxximent.
Il-programm ta’ taħriġ ġie indirizzat minn Niall Sheerin, rappreżentant tal-Kunsill tal-Ewropa, miċ-Ċentru ta’ Kompetenza għal Governanza Tajba. Huwa spjega kif it-12-il prinċipju ta’ governanza tajba jiġbru l-valuri fundamentali li jiddefinixxu viżjoni komuni ta’ governanza demokratika Ewropea.
Qal, “The 12 principles of good democratic governance are about promoting citizen participation, about council responding to citizens’ needs. It’s about administrating their governance in an open and transparent way, to respect the rule of law and avoid discrimination against other people, but also with the sustainable development goals in mind, looks for a sustainable, long-term vision that is respectful to the environment and is open to change.”
Preżenti għal din il-konferenza tal-aħbarijiet kien hemm is-Segretarju Parlamentari għall-Gvern Lokali, Alison Zerafa Civelli, li rrimarkat li jekk il-Kunsilli Lokali jimxu ma’ dawn it-tnax -il prinċipju, ir-residenti f’kull lokalità jista jkollhom ħajja ferm aħjar.
Qalet, “Irridu nħarsu ’l quddiem u nimxu ’l hemmhekk sabiex, jekk jista’ jkun, il-Kunsilli Lokali tagħna aktar ’il quddiem ikollhom kollha dan il-premju prestiġġjuż ta’ governanza tajba. Tnax-il prinċipju li għandhom jiġu mħaddma mill-Kunsilli Lokali tagħna fuq bażi ta’ Gvern lokali.”
