B’investiment ta’ żewġ miljun ewro se jibda xogħol ta’ tisbieħ fuq il-promenad ta’ Ta’ Xbiex u l-Imsidna fuq medda ta’ kważi nofs kilometru.
F’konferenza stampa fuq ix-Xatt ta’ Ta’ Xbiex, il-Ministru għat-Turiżmu Konrad Mizzi qal li l-proġett jinkludi t-twessigħ tal-promenade.
“Għaldaqstant flimkien mal-GHRC ippjanajna prominade li se jitwessa lejn il-baħar. Se jkun hawn faċilitajiet xorta waħda għas-sajjieda, se jkollna bicycle lane mill-isbaħ, sigurtà permezz ta’ CCTV cameras u dan huwa investiment ta’ żewġ miljun ewro. Jiġifieri n-nies tal-Imsida u ta’ Ta’ Xbiex jistgħu igawduh”
Il-proġett jinkludi wkoll karreġġjata għar-roti, bankijiet ġodda, sistema ta’ dawl ġdida u pavimentar akbar.
Il-Ministru Mizzi qal li dan il-proġett se jkun parti minn proġett ħolisitiku ta’ prominade akbar li jibda mill-Belt Valletta u jwassal għal San Ġiljan.
“U jkollna one prominade li huwa komdu u aċċessibli għal kulħadd, ikollok bike lane komuni wkoll biex kulħadd ikun jista’ juża r-rota tiegħu ukoll in a safe manner u naħseb li dawn huma affarijiet sbieħ ukoll”
Iċ-Chairman tal-Korporazzjoni għar-Riġenerazzzjoni tal-Port il-Kbir, Stefan Zrinzo Azzopardi qal li dan il-proġett huwa parti mill-viżjoni tal-Gvern biex jiżdiedu l-ispazji miftuħa u ta’ rikreazzjoni f’żoni turistiċi.
“Bħala parti minn proġett ta’ pjan ta’ Gvern li jkollna aktar spazji miftuħa. Ovvjament minħabba l-attività li hawn hawnhekk, wieħed ukoll irid jara b’mod għaqli t-timing ta’ meta jibdew dan it-tip ta’ proġetti, biex naraw li jinħoloq l-inqas inkonvinjent u li naraw ukoll illi r-realtajiet u l-isfidi kollha meħtieġa jiġu ndirizzati”
Is-Sindki tal-Imsida, Margaret Baldacchino Cefai, u ta’ Ta’ Xbiex, Max Zammit qalu li bil-flus li se jiffrankaw se jagħmlu proġetti oħra ta’ fejda fil-komunità.
