Kull proġett li nibdew, inlestuh fil-ħin u skont il-budget ippjanat, u din hija l-mera li rridu għas-snin li ġejjin.
Sosta dan il-Prim Ministru Robert Abela waqt intervista politika li matulha kompla jispjega l-viżjoni tal-Gvern għas-settur tat-trasport u l-infrastruttura f’pajjiżna, fi tmiem ġimgħa li matulha ġie inawgurat l-akbar proġett infrastrutturali f’Malta.
Huwa qal, “Aħna qed naraw dan il-proġett bħala wieħed minn sensiela. Jorbot miegħu r-roundabout ta’ Santa Luċija, roundabout tal-ajruport, Central Link, Kappara Junction. Dan huwa parti minn diversi mudelli fost l-oħrajn it-trasport bil-baħar. Irridu nħarsu lejn dan bħala mezz ewlieni ta’ trasport.”
Il-Prim Ministru semma l-legat li kien ħalla Gvern Nazzjonalista f’dan is-settur tant importanti għall-pajjiż, kif ukoll il-kumment ta’ Manuel Delia li qabbel il-proġett tal-Junction tal-Marsa ma’ Spaghetti Junction.
Dr Abela sostna: “Kien kumment ironiku dan. Lanqas tistennieh minn min il-viżjoni kellha żewġ karatteristiċi, trasport pubbliku li ma tgħaddix mit-toroq, u dawn il-buses kienu jinħarqu.”
Il-Prim Ministru fakkar ukoll kif Gvern Laburista investa bis-sħiħ fit-trasport pubbliku u kull sena, aktar nies qed jibbenefikaw minn servizz ta’ trasport pubbliku b’xejn.
Il-Prim Ministru rrefera wkoll għal proġett masiċċ ieħor li se jagħti nifs ġdid lill-poplu li jgħix mad-dawra tal-Port il-Kbir.
Il-proġett tas-shore to ship, investiment ieħor ta’ €70 miljun, se jwassal biex il-bastimenti li jsorġu fil-Port ikunu jistgħu jitfu l-magni u jieħdu l-enerġija dirett mill-art.
Il-Prim Ministru Robert Abela tenna: “Se jfisser differenza fil-kwalità tal-ħajja tan-nies. Għandek bastimenti li biex jaħdmu jħallu magni u generators għaddejjin. Inkonvenjent u iżjed emissjonijiet u b’dan il-proġett ambizzjuż il-kurrent biex jitħaddem il-bastiment se jittieħed minn fuq l-art.”
Waqt l-intervista tkellem is-Sindku tal-Marsa, li rrefera għal numru ta’ proġetti oħra li bbenefika u se jkun qed jibbenefika minnhom il-poplu tan-nofsinhar ta’ Malta, li taħt Gvern Nazzjonalista kien minsi.
Huwa saħaq: “Aħna kellna problema fin-naħa t’isfel ta’ Malta li l-affarijiet ħżiena fil-pajjiż kienu fin-naħa tagħna. Hemm ħafna xogħol xi jsir proġetti kbar li qed jitħabbru se jieħu ż-żmien għax dan mhux se tirranġa problema li niddejjaq ngħid li n-naħa t’isfel spiċċa dumping site ta’ Malta u issa qed nieħdu nifs ġdid.”
