Il-proġett Street Smart iservi biex iwassal messaġġ dwar is-sigurtà fit-toroq lit-tfal li jattendu l-iskejjel primarji.
Malta Public Transport u kumpanija tal-assigurazzjoni ħadmu fuq inizjattiva edukattiva innovattiva li għandha l-għan li tgħallem lit-tfal żgħar kif ikunu sikuri fit-triq permezz ta’ tliet vidjows interattivi, li jinqasmu f’25 pass, u li jistgħu jarawhom fil-klassi skont il-pass magħżul tal-għalliem jew għalliema.
Waqt it-tnedija li saret fl-Iskola San Anton, Javier Moreno, Kap Eżekuttiv ta’ MAPFRE Middlesea, qal li dan huwa mod uniku li bih jingħataw dawn il-lezzjonijiet minn dan il-proġett se jgħin lil dawn it-tfal żgħar ikunu aktar konxji dwar is-sigurtà u se tkun ukoll esperjenza memorabbli għat-tfal.
Konrad Pulé, General Manager ta’ Malta Public Transport, qal li t-tfal jistgħu jkunu katalist għall-bidla, speċjalment meta jikkunsidraw l-entużjażmu li bih jirrakkontaw il-lezzjonijiet li jitgħallmu fl-iskola mal-membri tal-familja tagħhom u b’hekk jgħinu biex ixerrdu aktar kuxjenza.
Il-videos edukattiv huma mmirati għal tfal żgħar, ta’ bejn l-erba’ u t-tmien snin. Dawn il-filmati jsegwu l-vjaġġ ta’ Safety Sue tul il-bord tal-logħob Street Smart, flimkien ma’ grupp varjat ta’ tfal, hekk kif jitgħallmu dwar suġġetti differenti relatati mas-sikurezza fit-toroq. Is-suġġetti jinkludu s-segwitu tas-sinjali tat-traffiku, li tkun sigur bħala pedestrian u l-użu tad-dwal tat-traffiku pedonali, li tkun sigur bħala passiġġier fil-karozza u l-importanza li tilbes iċ-ċinturin tas-sigurtà, li tkun sigur bħala passiġġier fuq il-karozza tal-linja u bħala ċiklist fit-triq; tkun sigur waqt li timxi u tivvjaġġa ma’ annimali, u distrazzjonijiet potenzjali bħall-użu ta’ apparat mobbli.
Il-membri tal-cast jinkludu Leah Mifsud bħala Safety Sue, il-kantanti żgħażagħ Ike u Kaya bħala DJ u l-Ispettur Ines, u ħafna aktar studenti żgħażagħ b’talent minn Stagecoach Malta.
Fi stqarrija, Malta Public Transport ħeġġet lill-iskejjel primarji interessati f’din l-inizjattiva biex jirreġistraw hawn jew jibagħtu imejl fuq colea@publictransport.com.mt.
L-iskejjel parteċipanti se jirċievu kopja tal-pakkett tal-worksheets flimkien mal-link għall-videos. Għalliema ta’ studenti li kienu jaraw it-tliet filmati jistgħu jitolbu ċertifikati ta’ Street Smart biex jiġu ppreżentati lit-tfal, flimkien ma’ rigal żgħir bħala tifkira tal-vjaġġ Street Smart. Ir-reġistrazzjonijiet qed jiġu offruti mingħajr ħlas fuq bażi ta’ min jiġi l-ewwel jinqeda l-ewwel.
