Nagħżel it-triq tar-realiżmu b’kontroll sħiħ f’idejn l-awtoritajiet Maltin.
Kien dan il-messaġġ ċar u sod li ta l-Prim Ministru meta fid-diskors tiegħu fil-Parlament semma t-tema tal-ħaddiema barranin.
Il-Prim Ministru Robert Abela aċċenna li filwaqt li wieħed irid jara li l-ħtiġijiet tal-pajjiż ikunu moqdija mhux se jiġi permess li jgawdu ftit nies għad-detriment tal-ħafna.
Dr Abela rrimarka fuq prinċipju ewlieni wieħed.
“Il-kontroll irid ikun fi ħdan l-Awtoritajiet Maltin. Il-prinċipju ewlieni huwa wieħed. Mhux se nippermettu li jgawdu ftit nies a skaptu tal-ħafna. Mhux se naċċettaw sitwazzjoni fejn biex ftit ftit nies jaqilgħu flus min fuq l-importazzjoni bla rażan tal-ħaddiema, jkollna piż mhux meħtieġ fuq il-poplu u fuq l-infrasstrutura tal-pajjiż. Għalhekk, fejn hemm, u żgur hemm setturi li dan il-pajjiż jeħtieġ li jkollu iktar ħaddiema fihom, allura hemm irid ikollna sistemi robusti li jiżguraw li ġewwa dan il-pajjiż, jidħlu ħaddiema ta’ kwalità, ħaddiema mħarġa u skont il-ħtiġijiet tal-pajjiż.”
Il-Prim Ministru Robert Abela
Il-Prim Ministru nnota riformi li diġà beda jdaħħal il-Gvern bħal l-għan li jrid jintlaħaq fis-settur tal-ospitalità fejn ħaddiema minn barra jidħlu fejn meħtieġ u jkunu ta’ kwalità billi jgħaddu minn assessjar tal-ITS kemm qabel jiġu u anki meta jaslu f’pajjiżna.
Dawk li jaqilgħu minn fuq il-ħaddiema li jitilqu wara sitt xhur u dlonk iġibu oħrajn, żmienhom spiċċa, sostna l-Prim Ministru.
Hawn semma r-riforma fit-temping agencies, dawk l-aġenziji li jġibu l-ħaddiema.
Dan hu u jinnota prinċipju soċjali kontra l-isfruttament tal-ħaddiema u anki kif prattiċi ta’ abbużi jiġu eliminati biex ma jkunx żvantaġġjat il-ħaddiema Malti u Għawdxi.
“Inħabbar li fil-kabinett tal-ġimgħa d-dieħla se nħabbar abbozz ta’ liġijiet li għandhom x’jaqsmu mat-temping agienciesLXtaqtha telgħet anke qabel però is-settur, l-istake holders u l-imsieħba soċjali xtaqu iktar konsultazzjoni u allura se tkun qiegħda titla’, dan l-abbozz se jkun qed jitla’ fil-kabinett il-ġimgħa d-dieħla. Smajan u se nibqgħu nisimgħu mingħand l-istake holders li għanhdom xi jgħidu. Imma r-regoli se jkunu ġodda u ċari. U la darba jibda l-proċess tal-applikazzjoni, min ma japplikax jieqaf se jopera minnufih.”
Il-Prim Ministru Robert Abela
Il-Prim Ministru spjega li se jkun hemm anki differenza dwar tiġdid ta’ permess ta’ ħaddiem barrani u li ġġib ħaddiem ġdid.
“Il-ħlas marbut ma’ dan tal-aħħar irid ikun ogħla”, saħaq il-Prim Ministru hekk kif sostna li għandu jkun hemm piż għal min joqgħod ibiddel il-ħaddiema minflok jinvesti f’dawk li hawn f’pajjiżna.
Saħaq li l-istess prinċipji ta’ serjetà ħa jkunu riflessi fil-kiri ta’ proprjetajiet fejn se jiġi assigurat li l-kerrej jikri l-post għal kemm tiflaħ il-proprjetà.
Dan anki b’rispett lejn il-ġirien u s-soċjetà li tgħix f’dan il-pajjiż.
