L-Uffiċċju Nazzjonali tal-Verifika (NAO) organizza ċerimonja ta’ preżentazzjoni ta’ ċertifikati lil dawk l-impjegati li attendew xi parti mill-kors tal-International Certificate in Public Audit, jiġifieri Audit and Assurance, International Public Sector Accounting Standards (IPSAS) u Financial Crime Investigations and Case Management. Dan il-Programm ta’ żvilupp professjonali, organizzat mill-NAO flimkien maċ-Chartered Institute of Public Finance and Accountancy (CIPFA), huwa parzjalment iffinanzjat mill-Fond Soċjali Ewropew taħt Investment Priority 11i.
Is-Sur Noel Camilleri, Deputat Awditur Ġenerali, qal li din l-okkażjoni timmarka stadju importanti tal-Programm ta’ Żvilupp Professjonali dan għaliex sa issa 43 impjegat diġà spiċċaw tal-anqas wieħed mill-moduli offruti ta’ dan il-kors. Huwa qal li gradwalment l-NAO qed isir “ċentru ta’ tagħlim iffaċilitat” u li jista’ jinqasam bejn il-parteċipanti kollha. Ferm aktar importanti huwa l-fatt li l-impjegati huma lesti li jaċċettaw kull tibdil u innovazzjoni meħtieġa. Huwa feraħ lill-membri tal-istaff għal dan is-suċċess u ħeġġiġhom ikomplu jistinkaw dejjem aktar biex jilħqu livell ta’ eċċellenza fl-isforzi professjonali tagħhom.
Fl-indirizz tiegħu, is-Sur Charles Deguara, Awditur Ġenerali, ingħaqad mad-Deputat Awditur Ġenerali biex jifraħ lill-impjegati għal dan is-suċċess u emfasizza l-bżonn assolut li l-NAO jkompli jinvesti kemm jista’ jkun fir-riżors l-aktar prezzjuż li għandu – ir-riżors uman. Huwa qal li kieku ma kienx għat-teamkompetenti u professjonali li għandu, l-NAO ma kienx ikollu daqshekk prestazzjoni eċċellenti din is-sena.
Fl-aħħar nett, is-Sur Deguara rringrazzja lid-Deputat Awditur Ġenerali u l-Manager, Finance and Administration, għall-organizzazzjoni eċċellenti ta’ dawn il-korsijiet ta’ taħriġ u lil dawk preżenti għad-dedikazzjoni sħiħa tagħhom lejn l-NAO. Huwa anki esprima l-apprezzament tiegħu kemm liċ-CIPFAgħall-koperazzjoni sħiħa fl-organizzazzjoni ta’ dawn il-korsijiet, kif ukoll lil Ms Campbell għall-involviment attiv tagħha fl-implimentazzjoni ta’ dan il-programm. L-Awditur Ġenerali rringrazzja wkoll lis-Sur Jonathan Vassallo, Direttur Ġenerali, PPCD, li kien preżenti għal din il-preżentazzjoni.
Is-Sinjura Nicola Campbell, Kap tal-Edukazzjoni Professjonali, CIPFA qalet li fid-dinja mgħaġġla tal-lum huwa importanti li organizzazzjonijiet bħall-Uffiċċju Nazzjonali tal-Verifika jkomplu jaraw kif se jiżviluppaw għarfien u ħiliet ġodda fl-oqsma ta’ verifika u kontrolli finanzjarji pubbliċi. U fil-fatt dan huwa dak li rnexxielhom jagħmlu l-parteċipanti li temmew b’suċċess dawn il-programmi u kisbu dawn iċ-ċertifikati CIPFA. Fl-indirizz tagħha lill-impjegati tal-NAO, is-Sinjura Campbell qalet li l-parteċipanti tul il-korsijiet tagħhom mhux biss urew kompetenzi u kapaċitajiet fir-rwoli rispettivi tagħhom iżda ġew issa rikonoxxuti bħala parteċipanti f’din il-kwalifika CIPFA. Żgur li bis-suċċess tagħhom kisbu l-ogħla standards f’dak li huwa Kontroll Finanzjarju Pubbliku Internazzjonali. Hija temmet tgħid li, “Il-kwalifiki CIPFA qed jagħtukom dawk il-ħiliet u l-għarfien li għandkom bżonn biex, b’mod infurmat għall-aħħar, tilqgħu għal kwalunke problema, argument jew kwestjoni preżenti, bħalma huma t-tibdil kollu li qed iseħħ fil-verifika pubblika u l-isfidi finanzjarji li jħabbat wiċċu magħhom is-settur pubbliku”.
