Il-Kap Eżekuttiv tal-midja tal-Partit Nazzjonalista, Pierre Portelli, jinsab taħt pressjoni kbira wara l-istħarriġ tal-Awtorità tax-Xandir li kien ippubblikat it-Tlieta li għadda. F’dan l-istħarriġ, l-istazzjonijiet tal-Partit Nazzjonalista komplew jaqgħu lura meta mqabbla mal-istazzjonijiet ONE, u internament qed jingħad li Portelli, imħallas somom kbar ta’ flus, wiegħed mod ieħor meta impona lilu nnifsu fit-tmexxija tal-istazzjon.
Artiklu fil-gazzetta Kullħadd spjega kif l-istħarriġ ta’ Ottubru kien mistenni, għaliex is-sajf li għadda Pierre Portelli daħal f ’kontroversji kbar biex jaqdi lilu nnifsu u nies oħra li jaf hu għall-iskedi l-ġodda tal-istazzjon NET. Tant kien kbir il-kunflitt ta’ interess, li kien spiċċa jmur fuq ir-radju jiddefendi lilu nnifsu mill-akkużi ta’ partitarji Nazzjonalisti ġenwini li ma setgħux jemmnu dak li kien qed jiġri.
Għalhekk mal-mument li dak li Portelli ħadem minn wara dahar ħafna ma taħx il-frott, reġgħu bdew jimmarkaw is-swaba’ lejh. U bir-raġun. Min-naħa tiegħu, Pierre Portelli ħareġ jattakka l-istħarriġ u qal li hu mimli inkonsistenzi. Anke jekk il-metodu tal-istħarriġ ma nbidilx, Pierre Portelli ħareġ imaqdru biex jiddefendi xturu.
Intant, fost dawk li tkellmu pubblikament kien hemm Frederick Zammit, l-awtur tad-drama Santa Monika li ntweriet il-bieb ta’ barra, biex minflokha daħlet Fattigi. Din hi produzzjoni li l-interess tagħha hu kollu kemm hu ta’ mart Pierre Portelli u l-kumpanija tagħhom. Tant, li kien hemm mumenti fejn Portelli kien għal kollox iffukat fuq il-bidu ta’ din id-drama. Zammit tkellem pubblikament, u fuq Facebook qal li basta neħħew id-drama tiegħu biex dak li daħal minflokha ma laħaqx dawn l-udjenzi. Iżda, l-imkejjen tagħna fl-istamperija sostnew li hemm affarijiet jaħarqu iktar minn hekk. Fost oħrajn Portelli qed ikun kritikat għax billi neħħa l-isem ta’ Radio 101 u għamel NET FM l-istazzjon tar-radju baqa’ jaqta’ lura meta mqabbel mal-oħrajn.
“Qed jerġa’ jissemma kif xejn ma kien imħejji bis-serjetà. Qed ifakkru filfamuż kelb fuq il-poster li ma kienx orġinali u li spiċċa ċ-ċajta ta’ ħafna fuq WhatsApp. Ħafna qed jgħidu ara b’liema mod irid jirnexxi Adrian Delia!”, sostnew l-imkejjen tagħna fid-Dar Ċentrali. Reġgħu nfetħu feriti oħra. Bħal dawk ta’ ġurnalisti li lmentaw mill-ħlasijiet lil ċerti persuni. Il-ġurnalisti kienu diġà lmentaw kif huma jikkuntentaw b’eluf ta’ ewro fis-sena inqas minn min idaħħal biex jilgħabha ta’ ġurnalist minflokhom bit-tama li jagħti iktar popolarità l-programmi tagħhom. Issa li kien ikkonfermat li dan ma seħħx allura iktar qed iħossu li l-kritika tagħhom hija ġustifikata.
Fl-istamperija, Portelli huwa deskritt bħala problema għal Delia, għax sa minn qabel laħaq kap rikbu u hemm min isostni li dak li għamel żmien jilgħabha ta’ ġurnalist indipendenti għandu saħħa fid-Dar Ċentrali iktar minn Portelli nnifsu tant li Delia kien jispiċċa imbarazzat. Mhux l-inqas meta Portelli u martu Nickie Vella De Fremaux spiċċaw f’battibekki pubbliċi fuq il-midja soċjali f ’dawk li kienu wħud mill-iktar mumenti imbarazzanti li għadda minnhom kap ta’ partit politiku Malti.
