“Qed naħdmu lejn pajjiż ta’ kwalità għax irridu li għada jkun aħjar mil-lum.” Kien b’dan il-kliem li l-Prim Ministru Robert Abela fetaħ id-diskors tiegħu, b’reazzjoni għall-Baġit 2025, it-Tlieta filgħaxija fil-Parlament.
Diskors ċar u pożittiv ta’ Gvern li verament għandu viżjoni u direzzjoni strateġika ta’ kwalità għal Malta u Għawdex tagħna.
Il-Prim Ministru kkwota numru ta’ mistoqsijiet li qed jistaqsi l-poplu fosthom, dwar l-ekonomija ta’ kwalità, il-bilanċ bejn l-investiment u l-ħaddiema barranin u l-infrastruttura li toffri t-trankwillità.
Mistoqsijiet li saħaq kif għalihom dan il-Gvern għandu s-soluzzjonijiet.
“Araw x’qed jiġri fil-pajjiżi ta’ madwarna. Araw x’inhu t-tluq mil-Libja, araw it-tluq mit-Tuneżija. Minkejja li rnexxielna jkollna dak is-suċċess u għaliex nafu li meta nagħmlu targets ċari kapaċi naslu għalihom, nemmen ukoll li issa meta niġu biex inkomplu nindirizzaw il-kwistjoni taż-żamma tal-ordni fuq il-ħaddiema barranin, hemmhekk se nkunu qegħdin naslu wkoll. Bl-istess mod li pajjiżna indirizza u għeleb b’suċċess l-isfidi li ġabet magħha l-pandemija. Hekk ukoll, l-istess se nerġgħu nindirizzaw u nsolvu u nsibu s-soluzzjonijiet għall-isfidi li hemm quddiemna. Ibqgħu emmnu fil-potenzjal kbir li għandu dan il-pajjiż u fil-potenzjal kbir ta’ niesu.”
Il-Prim Ministru anke tkellem dwar il-kwalità f’numru ta’ oqsma differenti, fosthom it-turiżmu, l-infrastruttura u mhux b’inqas dak tan-negozji.
“Ejja ngħidu kien jiġi investitur u jipproponi investiment li se jħaddem 400 ruħ – rarissimu kien se jkun dak. Kellek Gvern dakinhar li, bil-problema kbira li kellu tal-qgħad ta’ kważi 8,000 ruħ qegħda, lil dak l-investitur, irrispettivament mill-investiment li kien jipproponi, kien jaħtfu u jgħidlu ibda llum qabel għada biex itajjar 400 persuna minn fuq ir-reġistru tal-qgħad u tal-benefiċċju soċjali. Illum il-qagħda nbidlet totalment. Illum minn dak it-tip t’investituri li jiġu hawn u jipproponulna investiment li jħaddmu mijiet ta’ persuni, għandna kemm nixtiequ.”
Dr Abela kellu wkoll aħbarijiet sbieħ, fejn ħabbar kif issa, uffiċjalment, ġie konkluż il-ftehim għal 33,000 ħaddiem fis-Servizz Pubbliku u li, bih, il-Gvern se jagħti aktar minn biljun ewro lill-ħaddiema fiċ-Ċivil.
“Sur President illum qiegħed f’qagħda wkoll li bi pjaċir inħabbar li minn ġurnata waħda biss bi ħlas ta’ carers leave li qed nagħtu biex il-ħaddiema tas-settur pubbliku jieħdu ħsieb xi emerġenza ta’ qarib dawn issa se jkunu qegħdin jitilgħu għal tliet ijiem bi ħlas.”
Il-Prim Ministru temm dan id-diskors b’saħħtu b’messaġġ li dan il-Gvern se jibqa’ jaħdem għal ‘Pajjiż ta’ Kwalità’.
“Kwalità li tfisser serenità lil familji tagħna.Kwalità li tfisser serħan il-moħħ lill-anzjani tagħna.Kwalità li tfisser futur ta’ opportunitajiet għaż-żgħażagħ tagħna. Kwalità li tfisser servizz tas-saħħa eċċellenti. Kwalità li tfisser edukazzjoni li tiftaħ il-bibien għal karrieri. Kwalità fl-ekonomija tagħna, għax irridu li għada jkun aħjar mil-lum. Kwalità għall-Maltin u l-Għawdxin … biex igawdu l-aħjar…F’pajjiż trankwill u sigur. F’pajjiżna li tant inħobbu.”
