L-aktar persuna li dam imexxi klabb tal-futbol f’Malta.
Raġel fuq l-irġiel, il-flus qatt ma għamlu bih u umli.
Mhux la kemm taqbdu f’ritratt u biex tieħodlu kumment trid tagħmel wegħda.
Anthony Bezzina, President tal-Hibernians miet fl-età ta’ tnejn u sebgħin sena.
Raħal Ġdid hu orfni llum.
Fil-pjazza ta’ Raħal Ġdid, fejn min jaf kemm għadda minnha f’xi rebħ ta’ kampjonat spikkat il-ħemda u l-luttu għal dak li ta ħajtu għat-tim tal-Hibs.
David Carabott, wieħed mill-plejers leġġendarji għat-tim ta’ Raħal Ġdid qalilna kif jinsab mnikett bil-mewt ta’ Tony Bezzina, li miet f’daru t-Tnejn filgħodu.
Qalilna kif kull ftit jiem kien iċempel lil dak meqjus bħala t-tieni missier tiegħu u jsaqsih kif inhu.
Qal kif, “Hu kellu waħda s-Sur Tony, li mhux li jifraħ hu imma li jara lir-Raħal Ġdid ferħan magħqud. Dik kienet l-għan prinċipali tiegħu u flimkien mal-familja tiegħu dejjem issaportjaw lil dan ir-raħal biex kemm jista’ jkun iżommu magħqud u minn hawn jien nixtieq nirringrazzjah pubblikament ta’ kemm għamel miegħi u mal-familja tiegħi personali u min seta’ miss mas-Sur Tony.
Taħt il-Presidenza ta’ Bezzina, it-tim Pawlista għamel suċċessi kbar fosthom rebħ ta’ diversi unuri.
Taħt Bezzina b’kollox it-tim rebaħ disa’ Kampjonati Premier, sitt FA Trophies u tliet Super Cups.
Fl-2019 hu kien ingħata wkoll Ġieħ ir-Repubblika.
L-aħħar li Hibernians rebħu l-kampjonat kien fl-istaġun tal-elfejn u sittax fejn fiċ-ċelebrazzjonijiet li ttellgħu fil-pjazza ta’ Raħal Ġdid, Bezzina deher isuq hu id-double decker bil-plejers u diriġenti ta’ Hibernians fuqha.
Dakinhar kien sodisfatt għar-rebħ tat-tnax-il kampjonat għat-tim u Raħal Ġdid kien f’dellirju ta’ ferħ.
Kien qal, “Ma konniex qed nippretendu li nirbħu l-kampjonat imma imbagħad kif beda ġej il-logħob. Aħna l-idea kienet li nagħtu ċans lit-tfal u nrawwmu tim għall-futur”
Bezzina kien mutur ukoll fl-akkademja tal-Hibernians li tellgħet numru sabiħ ta’ plejers li fil-futur spiċċaw lagħbu bil-flokk abjad u iswed tal-Hibs fil-kampjonat Premier u anki għamlu isem man-nazzjonal.
Fost dawn hemm l-eks Captain ta’ Hibernians Mario Muscat li għamel sitta u għoxrin sena jilgħab għat-tim tal-pagun.
Spjega, “Ħdimt miegħu għal kważi 23 sena għadni niftakar l-ewwel ġurnata meta kelli 16-il sena kont iltqajt miegħu u żgur li l-unilta tiegħu u l-innoċenza tiegħu u kienet fattur importanti li jiena bqajt ma’ dan il-klabb u lagħbt għal diversi snin.”
Intant, matul il-jum tat-Tnejn kienu bosta li rreaġixxew għall-aħbar tal-mewt ta’ Tony Bezzina.
Fi stqarrija l-Assoċjazzjoni Maltija tal-Futbol, l-MFA, saħqet li Bezzina ta kontribut kbir fix-xena tal-futbol lokali.
Il-Partit Laburista wkoll sellem il-memorja ta’ Tony Bezzina u ta’ l-kondoljanzi lil qrabatu.
Tony Bezzina, il-ġentlom, Tony Bezzina r-raġel ta’ kulħadd, Tony Bezzina l-President tal-Hibs.
L-għajta grazzi tibqa’ tidwi.
