Is-sena d-dieħla l-maġġoranza tal-vetturi li jagħmlu parti mill-flottot t’entitajiet tal-Gvern ser jibdew jinbidlu b’mod gradwali għal oħrajn elettriċi.
Dan kien żvelat mis-Segretarju Permanenti Ewlieni Tony Sultana f’intervista ma’ dan l-istazzjon.
“Fil-fatt il-pjan tagħna huwa li s-sena d-dieħla noħorġu t-‘tender’ minn Fondi Ewropej fejn parti sostanzjali mill-flotta tal-Gvern, dawk li aħna nsejħulhom il-‘pool cars’, jinbidlu wkoll f’karozzi elettriċi.”
B’hekk il-Gvern ikun proattiv filwaqt li jmexxi bl-eżempju, fil-qalba għall-karozzi elettriċi, li għall-kuntrarju ta’ karozzi li jaħdmu bil-petrol jew bid-diżil ma jagħmlux ħsara lill-ambjent meta jkunu qed jinstaqu.
Is-Segretarju Permanenti Ewlieni, spjega wkoll it-tibdil li diġà qed jsir fix-xiri ta’ vetturi għal dawk li qegħdin fit-tmexxija tas-Servizz Pubbliku, fosthom Segretarji Permanenti, Diretturi Ġenerali, u Diretturi.
Hawnhekk il-karozzi ġodda li qegħdin jinxtraw qed ikunu elettriċi filwaqt li meta oħrajn eżistenti jkunu skedati biex jinbidlu dawn ukoll ma jkunux jaħdmu b’magni li jniġġsu.
“Dak ifisser li l-karozzi ġodda tal-‘headships’ jibdew jinbidlu minn karozzi tradizzjonali għal karozzi elettriċi, imbagħad ikun fadal il-karozzi li diġà jkunu għand il-‘headships’ preżenti. Ovvjament, dawk mhux se jinqalbu kollha f’daqqa imma meta jasal iż-żmien, dik il-karozza jgħaddilha ż-żmien u tkun trid tinbidel l-istess ħaġa trid tinbidel f’karozza elettrika.”
L-impenn tal-Gvern favur il-qalba għal vetturi li jniġġsu inqas tidher ċara wkoll fil-politika tiegħu. Dan fost oħrajn f’ħemel ta’ miżuri li jinċentivaw dan u li uħud kienu mġedda mill-ġdid fil-Budget għas-sena d-dieħla.
Dawn jinkludu l-inċentiv għal xiri ta’ vetturi elettriċi ġodda fejn permezz ta’ din l-iskema dawk li se jixtru vettura elettrika se jkunu qed jirċievu għotja ta’ €11,000 u, jekk jabbina din l-iskema mal-iskema tal-iskrappjar ta’ vetturi użati, l-għotja titla’ għal €12,000.
L-iskema ta’ l-iskrappjar ta’ vetturi antiki li jniġġsu f’Għawdex se terġa’ tiġġedded u l-għotja se tibqa’ ta’ €2,000.
Apparti minn hekk bħalissa għaddej ix-xogħol biex isiru 1,200 punt ieħor tal-iċċargjar għal karozzi elettriċi sas-sena 2024. Dawn jiżdiedu mat-340 charging pillar li diġà hemm. Fl-istess waqt li kumpaniji privati u n-negozji se jibqgħu jibbenefikaw minn self bla interessi sabiex jikkumplimentaw l-investiment li jagħmlu f’vetturi elettriċi u charging stations.
