L-hekk imsejħa “taxxa roża”, magħrufa internazzjonalment bit-terminu Ingliż ‘Pink Tax’, fil-fatt mhi taxxa xejn.
Dan it-terminu jirreferi għad-differenza li hemm it-tendenza fil-prezzijiet għall-istess prodott li jinbiegħ f’verżjonijiet kemm għan-nisa kif ukoll għall-irġiel.
Fil-fatt, dan huwa fenomenu madwar id-dinja kollha: li prodotti, li jiġu rriklamati speċifikament għan-nisa jkollhom prezz ogħla mill-istess prodotti li jkunu rriklamati speċifikament għall-irġiel.
Dwar dan il-fenomenu, ONE News għamel eżerċizzju fejn qabbel uħud mill-prodotti, fosthom dawk tal-iġene personali. Kien hemm fejn il-prezz tal-prodott speċifikament immirat għall-irġiel kien, fil-fatt, orħos minn dak reklamat għan-nisa.
Riċerka li ppubblika l-Forum Ekonomiku Dinji wriet li teżisti differenza fil-prezzijiet fuq il-bażi tal-ġeneru; differenza li hija evidenti l-aktar fi prodotti għall-iġene personali.
Dan l-istess studju, li sar fuq 800 prodott ta’ 100 kumpanija differenti, juri li l-medja tal-prodotti indirizzati lejn in-nisa huma 13 fil-mija ogħla minn dawk immirati lejn l-irġiel.
Komplejna bl-istħarriġ tagħna, fejn innotajna li kien hemm xi ditti ta’ fwejjaħ li għall-istess ammont ta’ fwieħa u bl-istess isem, il-fwieħa mmirata għall-irġiel kienet orħos minn tan-nisa.
Din id-differenza fil-prezzijiet tihder ukoll f’ċerti ħwejjeġ, fejn saħansitra għall-istess għamla ta’ flokk, il-prezz għall-irġiel huwa 20 fil-mija inqas minn dak għan-nisa. Madanakollu, huwa fatt ukoll li mhux kull prodott jew kull kumpanija tagħmel distinzjoni bejn il-prezzijiet għan-nisa u l-irġiel.
Ir-realtà tibqa’ li, kollox ma’ kollox, madwar id-dinja għad hemm diskriminazzjoni fil-prezzijiet bejn il-ġeneru, li qed taffettwa nisa minn kull sfera tas-soċjetà. Fil-fatt, In-Nazzjonijiet Uniti appellat lill-pajjiżi madwar id-dinja biex tiġi eliminata din id-diskriminazzjoni sabiex jiġi żgurat li n-nisa jiksbu parteċipazzjoni sħiħa u ugwali fl-ekonomija.
F’Jum il-Mara, tkellimna mas-Segretarju Parlamentari responsabbli mill-Ugwaljanza, Rebecca Buttigieg, li qalet li l-gvern Malti huwa determinat li jindirizza u jelimina t-tendenza li prodotti utilizzati min-nisa jkunu aktar għaljin minn dawk utilizzati mill-irġiel.
Żiedet tgħid li, barra minn hekk, waħda mill-wegħdiet fil-manifest elettorali ‘Malta Flimkien’ titkellem dwar it-tqassim b’xejn ta’ prodotti relatati mal-menstrwazzjoni fl-iskejjel. Is-Segretarju Parlamentari Buttigieg qalet li l-Gvern jemmen f’din il-miżura għax hija wkoll pass ’il quddiem biex tinqered l-istigma li għadha assoċjata ma’ dan il-proċess naturali.
Hija kompliet tgħid li l-Gvern diġà tellaq il-proċess biex tiġi implimentata din il-miżura, fost l-oħrajn billi qed jiġi analizzat x’impatt kellha din il-miżura f’pajjiżi li diġà wettquha sabiex pajjiżna jitgħallem mill-esperjenza tagħhom.
Is-Segretarju Parlamentari saħqet li, jekk ma nkunux aħna stess li nisfidaw l-istatus quo u nitkellmu fuq affarijiet li naħsbuhom kontroversjali u li ma jitkellem dwarhom ħadd, l-affarijiet li aħna nixtiequ li jinbidlu, jibqgħu ma jinbidlux.
