Il-Kummissjoni Ewropea għandha tieħu l-passi meħtieġa biex tiffaċilita l-introduzzjoni ta’ pestiċidi bioloġiċi b’riskju baxx għas-saħħa tal-bniedem fis-swieq Ewropej. Stqarret dan l-MEP Maltija Miriam Dalli meta kienet qed tindirizza s-sessjoni plenarja tal-Parlament Ewropew f’isem is-Soċjalisti u d-Demokratiċi.
L-użu tal-pestiċidi konvenzjonali ilu jiġi diskuss għal diversi xhur, hekk kif qed titqajjem aktar kuxjenza dwar ir-riskju li dawn jistgħu ipoġġu fuq is-saħħa pubblika, il-biodiversità ekoloġika u l-ambjent.
Quddiem dawn l-iżviluppi jinħass il-bżonn li jintużaw metodi differenti ibbażati fuq il-ħtieġa li jkun hemm bilanċ fl-ekosistemi agrikoli, li jitnaqqas kemm jista jkun l-użu ta’ pestiċida u li jkun inkoraġġit l-użu ta’ alternattivi bioloġiċi.
L-MEP Miriam Dalli rrimarkat li pestiċidi bioloġiċi jistgħu ikunu alternattiva adekwata għal prodotti tradizzjonali li jissalvagwardjaw il-pjanti u l-uċuħ tar-raba’ kontra l-insetti. Qalet li l-użu ta’ pestiċidi bioloġiċi jikkontribwixxi għal biedja sostenibbli u aktar serħan tal-moħħ lill-konsumaturi.
‘Din tista tkun soluzzjoni għal problema li ilna niddiskutuha bosta xhur, madankollu l-qafas regolatorju attwali, kemm f’livell Ewropew kif ukoll f’livell ta’ Stati Membri, qed ixekkel s-suċċess ta’ dawn il-prodotti minħabba li l-proċess ta’ awtorizzazzjoni u evalwazzjoni jimxi bil-mod ħafna. Dan qed iwassal għal disponibiltà limitata fis-suq. Għalhekk inħeġġeġ lill-Kummissjoni Ewropea biex tieħu l-passi meħtieġa u tneħħi l-ostakli għad-dħul fis-suq ta’ dawn il-prodotti,’ qalet Miriam Dalli.
L-MEP Laburista żiedet tgħid li l-Unjoni Ewropea għandha wkoll tixpruna aktar riċerka u innovazzjoni fl-iżvilupp ta’ dawn il-prodotti bioloġiċi.
‘Wara kollox qed nitkellmu dwar il-futur tal-biedja, u s-saħħa ta’ kull wieħed u waħda minnha’, temmet tgħid Dr Dalli.
Il-Pestiċidi bioloġiċi huma magħmula minn sustanzi naturali li ġejjin mill-annimali, pjanti, batterji u minerali oħra. Jaffettwaw speċi partikolari u b’hekk ma jkunux ta’ riskju għal insetti u għasafar oħra.
Bil-vot li se jittieħed fil-Parlament Ewropew, il-Kummissjoni Ewropea se tkun mitluba tilleġiżla favur proċess li jimxi b’ritmu mgħaġġel fuq l-evalwazzjoni, l-awtorizzazzjoni u r-reġistrazzjoni ta’ pestiċidi b’riskju baxx, bl-għan li din il-leġislazzjoni tiddaħħal qabel tmiem l-2018.
