“Qed naraw poplu li l-bidla daħlet fih u sar minnhu nnifsu parti mill-bidla, permezz ta’ dawn il-bidliet kulħadd ingħata d-dinjitá tiegħu” saħaq dan il-Prim Ministru Joseph Muscat f’attivitá poltika f’Ħal-Luqa.
Referendum Italja
Fid-diskors tiegħu l-Prim Ministru Joseph Muscat tkellem dwar ir-referendum fl-Italja u r-riżenja tal-Prim Ministru Taljan Matteo Renzi. Huwa stqarr li fl-Italja kellna sitwazzjoni ta’ Prim Ministru li prova jbiddel pajjiż iżda numru ta’ qawwiet ingħaqdu biex iwaqqfuh. Kien f’dan il-punt li f’Ħal Luqa, l-Prim Ministru elenka li jeħtieġ li nitkellmu aktar dwar il-bidla li qed nagħmlu f’pajjiżna. Huwa spjega li dan il-pajjiż sar ibiddel qabel pajjiżi oħra, u biddilna mentalitá li nbiddlu biss wara li jkunu biddlu pajjiżi oħra.
F’dan il-punt il-Prim Ministru rabat ir-riżultat tar-referendum fl-Italja mal-apprezzament għal mod ta’ kif il-poplu Malti u Għawdxi biddel il-mentalitá tiegħu u ddeċieda li pajjiżna għandu jkun aġent tal-bidla u ma jistenniex li pajjiż ieħor jieħu deċiżjonijiet dwar liġijiet bħal dawk tad-divorzju biex jidħlu f’pajjiżna. “Irrispettivament kemm għandek żmien, daħlet ir-realizazzjoni li pajjiżna jista’ jkun aqwa minn pajjiżi oħra, kien hemm bżonn politika li mhux tinħeba f’logħba tad-dellijiet iżda li tkun aktar realistika” fisser il-Prim Ministru.
Liġi tad-divorzju u l-unjoni ċivili
Il-Prim Ministru uża l-liġi tad-divorzju biex jispjega l-bidla qed iseħħ f’pajjiżna. Huwa spjega kif fl-2008, meta qal li jrid idaħħal id-divorzju f’pajjiżna, in-nies kienu ħadu xokk kbir, li persuna li qed taspira li tmexxi Partit Progressiv trid idaħħal dritt ċivili li persuna f’pajjiżna ma setgħetx tibqa’ mċaħħda minnhu. “L-unika ħaġa li kien jonqos f’pajjiżna biex il-bidla sseħħ kienet li n-nies li jmexxu jkunu lesti li jmexxu l-bidla fil-Moviment u f’dan il-pajjiż.”
Id-divorzju ma kinitx l-unika bidla f’dawk li huma drittijiet ċivili li għamel il-Gvern, fid-diskors tiegħu l-Prim Ministru tkellem dwar bidla oħra li turi kemm il-poplu Malti u Għawdxi jrid li jbiddel. Il-Prim Ministru tkellem dwar id-dritt tal-unjoni ċivili f’pajjiżna li għad irid jiġi żvilluppat u msaħħaħ aktar. Il-Prim Ministru qal li b’dan id-dritt “iċċaqlaqna minn fuq il-ħajt tal-astensjoni, ta’ nies li ma jridux juru verament x’jaħsbu u ħadna d-deċiżjonijiet biex kulħadd ikollu l-istess dritt.” Il-Prim Ministru fisser, li jekk ma jkunx dan il-moviment li jagħti lil kulħadd l-istess drittijiet, l-ebda moviment ieħor ma jista’ jagħmel din il-bidla.
Il-Prim Ministru jinsab ċert li minkejja li l-poplu Malti xi kultant, b’sens ġenwin kellhu dubju jekk żewġt irġiel għandhom irabbu tarbija flimkien, jifmhu li ebda persuna m’għandha tiġġudika lin-nies x’jagħmlu fil-ħajja personali tagħhom. Huma semmha l-esperjenza ta’ żewġ irġiel li addottaw tarbija Maltija, li madwar ħamsin koppja għażlu li ma jrabbuhiex għaliex għandha diżabilitá u li permezz ta’ din il-liġi din it-tarbija ngħatat futur li tgħix ma’ familja li tħobbha u li tieħu ħsiebha. “Bil-bidla fil-liġi li għamilna, tajnha għajxien f’familja lil wieħed min uliedna u dan huwa biżejjed biex ngħid, kemm konna koretti li daħalna din il-liġi.”
Il-bidla f’pajjiżna saret normalitá
Il-Prim Ministru għamel referenza ukoll għall-liġi tal-ġeneru fejn persuna tista’ tiddeċiedi l-ġeneru tagħha u li dawn il-bidliet jagħmluna l-aqwa fid-dinja f’dak li huwa progress ċivili u soċjali.
Fi tmiem id-diskors tiegħu, l-Prim Ministru fisser kif dan il-poplu m’għandux bżonn il-politikanti biex iwassal għal bidla, iżda qed naraw poplu li l-bidla daħlet fih u sar minnhu nnifsu parti mill-bidla.
