Pawla, popolarissima għas-sehem tagħha f’Liquorish, se tkun qed tirritorna fuq ONE bi programm ġdid. Lura fl-2015, 9 snin ilu, Pawla kienet rebħet l-edizzjoni ta’ dik is-sena tal-akbar reality-show fil-gżejjer Maltin, Liquorish. Wara din ir-rebħa, Pawla kienet ġiet avviċinata sabiex tibda tippreżenta l-programm Espresso, li kien jixxandar kuljum fuq ONE.
Wara diversi esperjenzi u s-sehem tagħha f’numru ta’ programmi, fejn anke ddebuttat bħala attriċi fis-sensiela komika ‘Il-Willy’, lil Pawla din is-sena erġajna rajniha waqt l-20 edizzjoni ta’ Liquorish, edizzjoni speċjali ‘All-Stars’. Bla dubju, kienu bosta s-segwaċi li għal darb’oħra ħadu gost issegwuha bil-karattru spontanju tagħha.
”Ninsab ħafna ferħana u entużjasta li se nerġa’ nkun viċin tagħkom it-telespetatturi ta’ ONE li dejjem bqajtu tagħtuni l-appoġġ tagħkom tul dawn is-snin, anke meta ma kontx inkun involuta f’xi programm televiżiv. Fuq kollox nirringrazzja minn qalbi lil ONE li għal darb’oħra tawni fiduċja u avviċinawni biex nagħmel dan il-programm fejn għalissa li nista’ ngħid biss se nitkellem ta’ spiss magħkom is-segwaċi. Qed inħarres ‘il quddiem għal din l-esperjenza ġdida u nitama li anke intom is-segwaċi ferħanin u entużjasti bħali għal din l-iskeda.
PAWLA
Mill-iskeda l-ġdida tal-Ħarifa 2024, Pawla se tkun impenjata f’programm ġdid li bil-karattru simpatiku u kariżmatiku tagħha, se jagħtiha l-opportunita’ li tkun aktar viċin tas-segwaċi ta’ ONE, dan għaliex dan il-programm se jagħti ċ-ċans lil bosta telespetatturi jitkellmu b’mod dirett magħha u m’oħrajn.
Infatti, bħalissa għaddejin il-preparamenti sabiex dan il-programm ġdid jibda jżomm kumpanija ħelwa lis-segwaċi ta’ ONE.
