L-emenda li għaddiet mill-Parlament, li tipproteġi l-ħajja tal-mara waqt kumplikazzjonijiet tat-tqala, dik magħrufa bħala Bill28, hija l-pass ’il quddiem fid-direzzjoni t-tajba hija parti mill-viżjoni tal-Gvern favur aktar riformi.
Dan intqal mill-President tal-Partit Laburista Ramona Attard f’artiklu fuq il-gazzetta MaltaToday, fejn sostniet li sa qabel din l-emenda nisa u l-professjonisti mediċi kienu jispiċċaw quddiem il-Qrati f’każijiet fejn tittieħed azzjoni f’każ ta’ kumplikazzjonijiet serji.
Hawnhekk hija semmiet li l-liġi kienet twassal għal sentenza ta’ ħabs ta’ bejn 18-il xahar sa tliet snin, waqt li l-professjonisti mediċi setgħu jeħlu sa erba’ snin ħabs.
Il-President tal-Partit Laburista fakkret li minn opinjoni tal-Avukat tal-Istat ħareġ li kien hemm nuqqas fil-liġi f’dan ir-rigward, fejn saħaq li ma kien hemm ebda serħan il-moħħ f’kwistjonijiet ta’ ħajja u mewt.
Semmiet li b’dawn l-emendi, Gvern Laburista biddel l-istatus quo.
Hawnhekk Ramona Attard qalet li dawn l-emendi jagħmluha b’mod ċar li mara b’kumplikazzjoni ta’ tqala m’għandiex titħalla tasal f’xifer il-mewt qabel professjonist jagħtiha l-kura meħtieġa, kif ġie spjegat fil-kumitat parlament li tlaqqa’ nhar it-Tnejn.
Dr Attard qalet li l-Gvern irreżista proposti bħal introduzzjoni ta’ maġistrat fil-proċess kollu.
Hawnhekk il-President tal-Partit Laburista nnutat li fid-dibattitu biex din l-emenda tkun tista’ ssir, l-Oppożizzjoni kienet “insensittiva u immatura”. Intqal li l-Oppożizzjoni mexxiet ’il quddiem dibattitu bbażat fuq gideb u spin, bil-Kap tal-Oppożizzjoni anki waqqa’ għaċ-ċajt mara li kellha diffikultajiet serji waqt it-tqala.
Dan filwaqt li l-Oppożizzjoni ddikjarat li m’hemmx bżonn dawn l-emendi u wara qalet li assolutament m’għandu jkun l-ebda referenza lejn is-saħħa tal-mara.
F’dan l-artiklu, il-President tal-Partit Laburista saħqet li li l-partit qed isegwi d-dibattitu dwar dan is-suġġett u qed jieħu nota tal-opinjonijiet tan-nies. Qalet li l-ebda kwistjoni ma tintefa taħt it-tapit, waqt li jkun hemm aktar diskussjoni.
Intant, l-editorjal tal-gazzetta ‘It-Torċa’, bit-titlu “Persważjoni Minflok Sensazzjonaliżmu”, nnota li l-persważjoni tieħu fit-tul biex tħalli l-frott mixtieq.
Ġie nnutat li l-Gvern ta’ Robert Abela “ma kien lest jaċċetta qatt li kollox jibqa’ kif inhu.” Dan filwaqt li fehem ċertu tħassib li kien hemm minn persuni ġenwini.
B’hekk, il-gazzetta kompliet tgħid li “kien korrett meta mill-ewwel wera li l-Gvern mhux se jkun supperv.” Iżda minflok kien lest jiddjaloga u jfiehem – proċess li dam xhur għaddej, iżda li permezz t’hekk “irnexxielu jikkonvinċi lil kulħadd dwar il-bżonn ta’ bidla fil-liġi.”
L-editorjal semma l-ġinekoloġi li permezz ta’ din l-emenda mhux se jibqa’ jkun hemm vaccuum legali – konferma ċara li l-bidla kien hemm bżonnha.
Intqal li dan it-test legali qiegħed jagħti serħan il-moħħ kemm lill-mara u anki l-professjonisti mediċi.
Fi tmiem dan l-editorjal ġie sostnut li isbaħ mid-djalogu m’hemmx u l-agħar ħaġa li toħnoq id-dibattitu huwa s-sensazzjonaliżmu.
