Qisek kellek ġugarell li tliftu u issa erġajt sibtu.
Hekk iddeskriva r-ritorn ta’ Cristiano Ronaldo mal-Manchester United, il-partitarju Kevin Tabone, li tkellimna miegħu l-għada li sar magħruf li l-plejer Portugiż se jerġa’ jibda jilgħab f’Old Trafford.
Ir-Red Devils se jħallsu ħmistax-il miljun ewro flimkien ma’ tmien miljuni oħra f’bonuses, b’Ronaldo mistenni jiffirma kuntratt ta’ sentejn.
Il-kaxxier tal-klabb tal-partitarji ta’ Manchester United f’Malta, spjega li kulħadd jinsab ħerqan biex jerġa’ jara lil Ronaldo liebes il-flokk tar-Red Devils.
Qal, “Li jkollok lil Ronaldo fit-tim diġà huwa impatt kbir, kemm fuq il-klabb kif ukoll fuq il-partitarji, li jgħin biex dawk l-aspettattivi li kellhom jogħlew aktar milli kienu qabel.”
F’sitt snin, bil-flokk tal-United, Ronaldo rebaħ tliet titli tal-Premier League, iċ-Champions League, żewġ League Cups u FA Cup.
Huwa rebaħ ukoll il-FIFA Club World Cup u l-Community Shield taħt Sir Alex Ferguson.
Fl-ewwel avventura tiegħu ma’ Manchester United, Ronaldo skorja mija u tmintax-il gowl f’mitejn u tnejn u disgħin logħba.
Mal-aħbar li l-karriera ta’ Ronaldo mat-tim Taljan, Juventus, intemmet, il-plejer Portugiż li rebaħ aktar minn tletin trofew ewlieni tul il-karriera tiegħu, qal li l-partitarji ta’ Juventus dejjem irrispettawh u rreċiproka dan ir-rispett billi ssielet għalihom f’kull logħba.
Qabel telaq, Ronaldo għamel madwar siegħa u nofs isellem lill-plejers Juventini, qabel ma beda l-vjaġġ privat tiegħu lejn Lisbona.
Kevin Tabone spjega li Ronaldo ta’ bejn l-elfejn u tlieta u l-elfejn u disgħa huwa differenti minn Ronaldo tal-lum.
Spjega, “Diversi emozzjonijiet, nostalġija qed ikollhom parti kbira. Nipprova nieħu kontroll li nifhem li United dak iż-żmien, kellhom ukoll tim differenti bi plejers differenti wkoll. Hemm plejers żgħar lllum li żgur se jgħinu biex Ronaldo jgħinhom ukoll jaspiraw dak il-livell li rnexxielu jilħaq Ronaldo.”
